Ang Department of Education (DepEd) Division sa Mandaue City nagkanayon nga 90 porsiyento na ang pagpangandam sa mga tunghaan sa siyudad alang sa pagbukas sa klase karong umaabot Agusto 22 alang sa school year 2022 hangtod 2023.
Si DepEd Mandaue Division Superintendent Nimfa Bongo nitug-an sa SunStar Cebu sa Lunes, Agusto 15, 2022, nga kadaghanan sa ilang mga preparasyon nahimo atol sa “Brigada Eskwela” nga ilang gilusad niadtong Agusto 2.
Si Mylene Ordilla, senior education program specialist ug Brigada Eskwela coordinator, niingon nga malampuson ang nagpadayong Brigada Eskwela nga nakatigom na og halos 15,000 ka partisipante, kadaghanan mga ginikanan.
Matod ni Ordilla nga wala silay nadawat nga reklamo kalabot sa kalihukan ug sa pagkakaron nagtinabangay ang mga partisipante.
Si Bongo niingon nga anaa sila sa final nga pangandam nga naglakip sa pagtudlo og non-teaching school personnel aron masiguro nga ang mga classroom ug mga pasilidad nag-obserbar sa saktong health standards ug protocols alang sa optimized health protection sa mga estudyante.
Naghuwat usab sila sa paghatod sa pipila ka learning modules nga gamiton sa mga estudyante alang sa pagpadayon sa klase aron mahuman na ang 10 porsiyento sa ilang pagpangandam.
Isip dugang pagpangandam, ilang gilusad ang “Oplan Balik Eskwela” niadtong Lunes, diin nag-organisar sila og Balik Eskwela task force aron matubag ang tanang posibleng pangutana sa mga ginikanan ug uban pang education personnel alang sa umaabot nga pag-abli sa klase.
Si Bongo niingon nga ang Mandaue adunay dul-an sa 89 ka mga tunghaan (elementary ug high school) nga mosalmot karong tuiga, 45 ka publikong tunghaan, 43 ka pribado, ug ang semi-private nga Mandaue City College, nga nagdumala sa grade 12 nga mga tinun-an.