Si Senador Imee Marcos nibutyag nga sa tinud-anay, ang grupo sa mga smuggler og sibuyas bombay maoy nagmugna og kakuwang sa supply sa lamas. Sa iyang pagsubay, ang Dept. of Agriculture wa makapresentar og kongkretong kamatuoran nga dunay kakuwang sa supply sa sibuyas bombay.

Matod sa senador, nabuking na ang modus sa mga smuggler nga magpayuhot, dayon magmugna og kakuwang supply, mang-import gilayon. Sa pakisusi sa Senado sa miaging tuig, dunay pipila ka mga opisyal sa kagamhanan, labina sa Dept. of Agriculture (DA) nga kakunsabo sa smugglers og ahos.

Dugay na kaayo ning isyu sa smuggling, diin dunay mga opisyal ug kawani sa kagamhanan nga kakunsabo. Dugay na kining isyuha sa Bureau of Customs unya karon naa na sab sa DA.Di kaayo malampuson si kanhi Presidente Duterte sa pagsumpo sa smuggling sa iyang administrasyon kay ang pagpayuhot og ahos nga gireklamo sa mga mag-uuma sa Luzon nahitabo sa iyang administrasyon. Karon, bisan si Senador Marcos nakabantay niini.

Karon nga gipangunayan ni Presidente Ferdinand Marcos Jr. ang pagpangu sa DA, hinaut pang ang smuggling nga nagsugod na sab og sulod sa mao nga departamento mahunong na. Sa smuggling, daghan ang maalkansi. Nag-una nga apektado mao ang mga mag-uuma nga maglisod na sa pagbaligya sa ilang abot tungod kay toay mas barato nga gipayuhot nga mga lamas ug utanon. Maalkanse na sila sa ilang produksyon tungod kay kadaghanan way suporta gikan sa kagamhanan.

Maalkansi usab ang kagamhanan kay sa smuggling, way bisan usa ka sentimos nga mahiadto sa gobyerno, apan moburot ang bulsa sa mga negusyanteng smuggler ug ilang mga kunsabong opisyal sa kagamhanan.

Ang resulta niini mao ang pagkaguba sa industriyang agrikultura sa nasod kay wa na may mga mag-uuma nga ganahan mobubo og puhonan sa panguma kay alkanse man sila.