Barangay konsehal namatay samtang amahan ug anak nangaangol sa managlahing mga bangga nga naglambigit sa mga motorsiklo sa managlahing mga dapit sa lalawigan sa Sugbo.

Sa Lunes sa alas 6:30 sa buntag, Agusto 15, amahan ug anak nangaangol dihang ang ilang motorsiklo gidaro sa mini bus sa national highway sa Sitio Eme, Brgy. Damolog, lungsod Sogod, amihanang Sugbo.

Gitanggong si Randy Rivera, hingkod, driver sa minibus Foton Tornado (AAZ 5978).

Nalandig sa tambalanan sila si Ariel Pepito, 44, minyo, taga Sitio Caduang, Brgy. Damolog, Sogod, ug anak nga si Ariel Arrabis Pepito, 17.

Sa imbestigasyon ni Police Master Sgt. Teogenes Flores, imbestigador sa Sogod Traffic Police, si Rivera nibutyag kaniya nga nawad-an siya og kontrol sa sakyanan human nibasiyo ang brake samtang nagdulhog sa karsada sa Eme.

Gikan sila sa lungsod sa Tabuelan paingon sa dakbayan sa Sugbo dihang gikasugat nila ang XRM nga gisakyan sa mga Pepito nga gikan sa Sogod paingon sa Lugo, lungsod sa Borbon.

Matud ni Rivera nga atol sa iyang pagliko sa blind curve, nawad-an siya’g kontrol sa sakyanan kay nipalyar ang brake hinungdan naigo niya ang gisakyang motorsiklo sa mga biktima.

Gumikan sa kakusog sa impact, nangalagpot ang amahan ug anak.

Ang motorsiklo naguroy pag pipila ka metros nga ang katunga gilamoy sa ligid sa minibus.

Nahunong ang minibus dihang naigo ang bato sa daplin samtang ang mga biktima gidali sa pagdala sa Sogod District Hospital.

2 KA MOTOR

Sa laing bangga, patay ang usa ka barangay konsehal human iyang motorsiklo nibangga sa gikasugat nga motorsiklo alas 5:13 sa hapon sa Dominggo sa national highway sa Looc Sur, lungsod sa Asturias.

Si Alfeo Balza, 49, minyo, konsehal sa Brgy. Langub, Asturias, patay nang niabot sa tambalanan.

Naangol ang iyang gikasugat nga si Renan Obligar, 26, dunay kapuyo, construction worker, taga Brgy. New Bago, lungsod sa Asturias, kinsa naa pa sa tambalanan sa Balamban.

Si Police Staff. Sgt. Gilmer Noval sa Asturias Police Station nga nahinabi sa Superbalita Cebu nagkanayon nga si Balza padulong na mopauli sa ilang panimalay dihang ni-overtake sa laing motorsiklo apan iyang gikasugat si Obligar.

Gumikan sa kakusog sa impact, grabi ang naangkon nga kadaot sa barangay konsehal nga patay nang niabot sa tambalanan sa Asturias.

Si Obligar gidali sab sa pagdala sa tambalanan sa Balamban human nakaangkog kadaot sa kalawasan.

Sumala pa ni Noval, nga kusogkusog ang pagpadagan sa konsehal.

NALIMBUWAD

Samtang pito ka mga miyembro sa usa ka pamilya nangaangol human ilang Strada pick-up nalimbuwad alas 5:50 sa hapon sa Dominggo sa national highway sa Brgy. Anonang Norte, dakbayan sa Bogo kay gilihayan ang laing sakyanan.

Mga nangaangol giilang sila si Boots Bojos Pedrano, Meldy Mae Dublin Bojos, Arkisha Lace Pedrano, Lyle Arkin Pedrano, Myrna Bojos, Reynaldo Pedrano ug Estrella Pedrano, pulos taga Brgy. Lapaz, Bogo City.

Si Police Lt. Col. Florendo Fajardo, hepe sa Bogo City Police Station nga nahinabi sa Superbalita Cebu nagkanayon nga ang mga biktima gikan sa lungsod sa Carmen padulong mopauli sa dakbayan sa Bogo.