Walay hunong ang gilusad nga ‘rescue operations’ sa kapulisan sa dakbayan sa Sugbo sa mga menor de edad nga nakalapas sa curfew ordinance sa Siyudad.
Niadtong Biyernes sa gabii Agusto 12, 2022 hangtod sa Sabado sa kaadlawon, Agusto 14, 2022, naka rescue sila og 38 ka mga batan-on nga naa pa sa gawas bisan lapas na ang alas 10 sa gabii hangtod sa kaadlawon.
Pagka Sabado sa gabii hangtod Dominggo sa kaadlawon, Agusto 14, 2022, niubos ang gidaghanon ngadto sa 17.
Nagtuo ang kapulisan wala kaayo nanggawas ang mga menor de edad tungod sa siging uwan nga nasinati sa siyudad.
Matod ni Police Lieutenant Colonel Maria Theresa Macatangay, information officer sa Cebu City Police Office (CCPO), nga samtang aduna pay mga batan-on nga manggawas panahon sa lawom na nga gabii, magpadayon usab ang “rescue operations” sa kapulisan.
Wala hinuoy multa o silot nga gipahamtang sa mga ma-rescue sanglit i-turnover ra man usab nila kini sa barangay diin sila nanimuyo.