NATIWASAN og kahugno ang duha ka balay sa nahitabong linog alas 4:23 sa hapon, Lunes, Agosto 15, 2022, sa Datu Montawal, Maguindanao Province.
Sigun sa taho gikan sa Municipal Disaster Risk Reduction and Management Office (MDRRMO) nga ang duha ka balay sa Barangay Bulit sa nahisgutang lungsod, nihirig nang daan human nga maigo og baha sa miaging semana.
Suwerte nga walay nadisgrasiya sa mga namuyo sa balay atol sa linog kay nakabakwit na silang daan sa taas nga bahin tungod sa baha sa miaging semana.
Una na nang nagpasidaan si Datu Montawal Mayor Datu Otho Montawal sa mga molupyo sa lungsod nga mag-amping ug mag-igmat sa kaugalingon sa bisan unsang kalamidad.
Kahinumdoman nga 11 ka barangay sa lungsod ang gilunopan gumikan sa pag-awas sa Pulangi River tungod sa way puas nga pag-ulan.
Hinuon ang lokal nga panggamhanan sa Datu Montawal ug Bangsamoro Autonomous Region in Muslim Mindanao (BARMM) nagpaabot na og hinabang sa ngadto pamilya nga naapektuhan sa baha ug linog.