Sumala sa ECPAT International, ang United Nations Children’s Fund (Unicef) Office of Research, ug sa Interpol, mokabat sa duha ka milyon ka kabataan sa Pilipinas ang nabiktima sa online sexual abuse sa miaging tuig lamang.
Apan hayan nga masulbad kini kon ipatuman ang Republic Act (RA) No. 11930, ang Anti-Online Sexual Abuse and Exploitation of Children (OSAEC) nga nahimong balaod sa Hulyo 30, diin 30 ka adlaw gikan sa pagsumitir niini sa Office of the President.
Ang maong balaod nag-amendar sa Anti-Pornography Act (RA No. 9775) aron magpalig-on sa pagpanalipod sa kabataan batok sa online sexual exploitation, bisan pa kon nitugot niini ang biktima mismo.
Gipaumentohan sa maong balaod ang responsibilidad sa mga social media websites ug sa mga electronic service providers ug nagsilot sa paghimo, pagtan-aw ug pagpaambit sa bisan unsang matang sa mga child sexual abuse and exploitative materials (CSAEM).
Si Senador Risa Hontiveros, principal author sa maong balaod didto sa Senado, miingon nga ang maong balaod nag-define sa salaod nga “online sexual abuse and exploitation of children” ug nagpahamtang og silot niini.
Gimandoan usab ang mga electronic service providers, internet intermediaries, financial intermediaries sa pagbabag ug pagpreserbar sa ebidensiya sa online sexual abuse and exploitation of children ug sa pagtugyan niini ngadto sa mga tinugyanan sa balaod.
Matod ni Hontiveros, dunay tulo ka tahas ang mga internet intermediaries. Mao kini ang pagtangtang sa mga materyales nga makalapas sa mga katungod sa kabataan, ang pagpreserbar sa ebidensiya ug ang pagtugyan dayon niini ngadto sa mga tinugyanan sa balaod.
Kon mapakyas sila sa paghimo niini, mag-atubang sila sa silot nga pagkabilanggo gikan sa walo ka tuig ug usa ka adlaw ngadto sa 10 ka tuig ug multa nga P2 milyones sa first offense ug P3 milyones ug revocation of license to operate sa mosunod nga kalapasan.
Ang maong balaod nagmando usab sa pagmugna sa usa ka National Coordinating Center batok sa OSAEC ug CSAEM pinaagi sa Inter-Agency Council Against Trafficking. Sa samang paagi mugnaon ang usa ka “offenders registry” nga maglista niadtong mga tawo nga nakombikto nga sexual offenders of children.
Sa pagtuon sa Unicef, ang Pilipinas nahimong sentro sa child sex abuse materials production sa tibuok kalibotan ug hangtod sa 80 porsyento sa kabataan sa Pilipinas nahimutang sa risgo sa online sexual violence. Ang subo nga palandungon mao nga daghan sa maong mga kaso binuhatan sa mga ginikanan mismo sa maong kabataan. - edbarrita@gmail.com