Suway unta nga mo-eskapo ang motorcyle rider nga wa nag-helmet gikan sa mga nagpatrolya nga pulis sa Dakbayan sa Talisay, apan sa tantong ginukdanay na-corner ug nadakpan.
Giila ni Police Lieutenant Colonel Randy Caballes, hepe sa Talisay City Police Station ang rider nga John Mathew Canindo, 20, taga-Barangay Babay, Lungsod sa Sibonga, Sugbo.
Atol sa pagkasikop sa maong rider nga naabtan sa may dalan Rabaya gikan sa Barangay Tabunok, nasuta nga ang motorsiklo nga iyang gimaneho kinarnap.
Nakuhaan sab og lima ka pakete nga adunay sulod nga gituohang shabu.
Dugang ni Caballes nga sa pagsusi sa iyang mga sakop nasayran nga si Canindo aduna diay giatubang nga reklamo pangawat og motorsiklo ug pagpangawat sa mga Dakbayan sa Lapu-Lapu ug Talisay.
Nagduda pa ang mga pulis nga adunay kiniy reklamo batok kaniya sa Dakbayan sa Sugbo hinungdan nga nakig-layon na si Caballes sa CCPO.
“Kining atong nadakpan duna ni kaso nga drugs ug motornapping sa lungsod sa Argao niadtong tuig 2019,” butyag ni Caballes.
Ang modus sa suspek nga kon duna kini mauyonan nga motorsiklo, iyang amigohon ang tag-iya o biktima. Kon babaye iyang uyabon lakip na kon bayot. Himuon niya ang tanan aron siya kasaligan ug tuohan.
“Naay usa sa iyang biktima usa ka babaye diay to iyang uyab, panguyaban niya unya ug maamigo na niya didto na niya plano nga hulman ang motor ug dili na ibalik,” dugang ni Caballes.