Agdon sa League of Cities of the Philippines (LCP) ang Kongreso ug si Presidente Ferdinand ‘Bongbong’ Marcos Jr., kon piniliay sa Barangay ug Sangguniang Kabataan ipahigayon.
Kagahapon, Agosto 16, 2022 nagkatapok ang mga mayor sa nagkadaiyang bahin sa nasud sa Dakbayan sa Sugbo alang sa tigum sa LCP.
Si LCP President ug Cebu City Mayor Michael Rama nagkanayon nga ila nang nahisgutan ang mahitungod sa pagpahigayon sa Barangay, SK elections (BSKE) tali ni Marcos Jr.
Matod pa ni Rama base sa pamahayag sa Presidente nga iyang gitahasan ang Kongreso nga mohimo og desisyon kon angay bang iuswag o dili ang maong piniliay.
Nasayran nga ang House of Suffrage and Electoral Reforms committee ang mi-uyon pinaagi sa pagbotar sa postponement sa BSKE nga gikatakda karong Disyembre ning tuiga ngadto na sa Disyembre 4, 2023.
Sumala pa ni Rama nga paluyohan sa LCP kon unsay makab-ot nga desisyon sa bag-ong administrasyon mahitungod sa BSKE.
“We assured the President that the league will never be a stumbling block to the wishes and desires of this administration,” pamahayag ni Rama.
Sa tulo ka adlaw nga panagtapok sa LCP nga gisugdan kagahapon, Agusto 16, lakip sa ilang paminawon ang concerns sa mga mayor may labot sa maong hisgutanan.
Usa sa gituki sa mga mayor atol sa ilang panagtigum mao ang maayong gawi sa pagdumala sa usa ka local government unit ug mga hisgutanan kabahin sa local governance.