Ang lalawigan sa Sugbo maoy nag-una sa mga probinsya ug highly urbanized cities sa Central Visayas nga adunay labing daghan og mga kaso sa dengue.
Ang Central Visayas Center for Heath Development Communications Management Unit nagkanayon nga adunay 11,475 ka dengue cases ug 72 ang namatay base sa talaan sa Agusto 6, 2022.
Sa maong gidaghanon, ang Cebu adunay 4,430 ka dengue cases; Cebu City (2,062), lalawigan sa Bohol (1,759), Lapu-Lapu City (1,244), Negros Oriental (1,197), Mandaue City (621), ug Siquijor (90).
Sa report nga giduso ni Dr. Eugenia Mercedes Cañal, cluster head sa Regional Epidemiology and Surveillance Unit (RESU), nigtug-an nga sa 72 nga nakalas sa dengue, 27 niini gikan sa Cebu; 25 sa Cebu City; 10 sa Lapu-Lapu; 6 sa Negros Oriental; ug 4 sa Mandaue City.
Ang lalawigan sa Bohol ug Siquijor walay natala nga adunay namatay sa dengue virus sa duha ka probinsya bisan kon adunay dul-an sa 2,000 nga nataptan sa maong sakit sa mga lumolupyo nga sakop sa ilang lalawigan.