Magtutudlo sa usa ka inilang unibersidad sa dakbayan sa Sugbo nga kanhi seaman gipadakop sa duha ka mga babaye nga iyang kasakay sa van for hire (v-hire) human giingong iyang gipanghinol ang dughan niini.
Ang v-hire gikan sa lungsod sa Daanbantayan, Probinsya sa Sugbo nga paingon sa North Bus Terminal.
Ang suspek giila nga mao si Neil Montellano Bulambao, taga Barangay Nailon, Bogo City, amihanang Sugbo.
Base sa asoy sa biktima nga gitago sa ngalang Gina, 26, taga dakbayan sa Danao ug nurse sa usa ka pribadong tambalanan sa dakbayan sa Sugbo, uban niya ang iyang uyab nga nisakay sa van gikan sa Barangay Sabang, Danao niadtong Agusto 15, 2022 sa sayong gabii.
Nitupad siya sa usa ka lalaki nga niadtong tungora nagsabak sa iyang bag ug nagpiyong ang mata. Apan paglabay sa pipila ka minutos, kalit lang gihikap sa iyang tupad ang iyang bukton.
Nagtuo si Gina nga wala ra matuyo, apan giusban siya niini ug didto na sa iyang dughan natugpa ang kamot ni Bulambao ug tungod niini nidistansya siya.
Pag-abot sa lungsod sa Consolacion, wala siya nakabantay nga nipaduol kaniya si Bulambao ug giingong nikuot na sab sa iyang dughan.
“Nagtuo ko permiro nga iya lang nahikapan akung totoy. So, wala ra ko. Pagsunod kay diri naman gyud ang iyang nahikapan gisulod na man gyud niya iyang kamot. Midistansya nako niya, pag-abot sa Lacion (Consolacion) na ana-an naman sad pagbalik distansya na gani ko niya, nitutok na ko niya,” asoy ni Gina.
MANYAKIS
Ang iyang kauban nga pasaherong babaye nga bag-o lang nakapasar sa lisensure examination for teacher (LET) nga si alyas Jasmin, 30, minyo, taga Sityo Badiang, Barangay Tinubdan, Lungsod sa Daanbantayan giingong unang nakumotan sa totoy samtang nakatagpilaw siya sa biyahe.
Nakamata na lang siya nga ang kamot sa magtutudlo naa na ilawom sa iyang bra ug naghinolhinol na nga maoy hinungdan nga gisultihan si alyas Gina nga “manyakis” ang suspek.
Dinhi na nahitabo ang kagubot sa sulod sa van diin hapit pa nakulatahan sa hinigugma ni Gina ang suspek, apan maayo na lang kay napugngan.
Nisuway pa unta sa pagkanaog si Bulambao sa dihang adunay pasahero nga nipara sa van, apan gitabangan siya og pugong, dungan sa pagpangayog pasaylo. Ang driver sa van nipasutoy sa pagpadagan ug nihunong sa Basak Police Station sa Mandaue City Police Office ug gipadakop ang magtutudlo.
Gipaubos sa imbestigasyon si Bulambao ug nasuta sa kapulisan nga aduna kini pending warrant of arrest sa kasong theft hinungdan nga gidiretso siya og balhog sa bilanggoan.
Nag-atubang og duha ka mga kasong acts of lasciviousness ang suspek human gisang-at sa Basak Police Station sa korte.