Mipakatap og 29 puntos ug 11 ka rebounds si Zachary Huang, lakip na niini ang bayanihong itsa sa overtime, aron ituboy ang Asian Orthopedics Batch 2014 ngadto sa kulbahinam nga kadaugan, 92-90, batok sa Carampatana Food Corp. Batch 2012 sa nagpadayon nga 25th Sacred Heart Ateneo Alumni Basketball Athletic Association (SHAABAA) Division C sa Martes sa gabii sa Magis Eagles Arena sa dakbayan sa Mandaue.
Ang bayanihong lihok ni Huang iyang nahimo sa katapusang kuwatro segundos sa overtime period human niya makompleto ang three-point play nga maoy naglansang sa ilang ika-unom nga kadaugan ug pabiling wala pa makaangkon og kapildihan.
Human matabla, 77-77, sa overtime period, ang duha ka koponan sikit kaayong nagkombati nga nagpulipuli usab og sakmit sa bintaha.
Diha na gyud unta sa mga kamot sa Batch 2012 ang kadaugan, 90-89, sa himatyong mga segundos apan ang ilang kapakyas sa pagpakgang ni Huang maoy kalit nagpapas sa ilang kahigayonan.
Gawas kang Huang misuporta usab kaniya sa opensa sila si Jair drie Igna nga may 23 puntos ug Giovanni Laguyo nga midibuho og 17 puntos ug walo ka assists.
Ang Carampatana Food Corp nga nahagsa sa 2-1 nga baraha gipangulohan ni Adven Jess Diputado nga may 22 puntos samtang 21 puntos usab ang nahimo ni Julius Cadavis kinsa nakalangkat usab og 13 ka rebounds.
Sa laing duwa, double-double performance ang gidalit nila ni Lyder Kent Canieso, Eroll Pastor, Benedict Chua ug Xavier Tarriman aron puohon sa SABR Solutions Batch 2018 ang UNAHO, Inc. Batch 2022, 87-81.
Si Canieso mitali og 30 puntos ug may 13 ka rebounds, si Pastor mikolekta usab og 18 puntos, 10 rebounds samtang si Chua mihagpat og 15 puntos ug 16 ka rebounds.
Mitapos usab sa duwa si Tarriman nga may 14 puntos ug 11 ka rebounds.
Wa man tuod makabingat og maayo sa ilang labaw ang Batch 2018, apan wa usab nila hatagi og kahigayonan nga makalabaw ang 2022 nga gipangulhan sa 22 puntos ni Uriel Avila ug 19 puntos gikan ni Joseph Dytian kinsa aduna usay 11 ka rebounds.
Sa Division B, ang king of the rebounding department nga si Leigh Christian Dixon milangkat og 27 ka rebounds ug 22 puntos aron ituboy ang Bad Boys Wingz-2007 ngadto sa ikatulong daog, 74-71, batok sa Batch 2004.
Samtang yano ra usab nga gipugnit as Cebu Landmaster Batch 2003 ang ilang ikalimang daog pinaagi sa paglubong buhi sa Batch 2006, 87-60. (JBM)