Ang Kagamhanan sa Dakbayan sa Mandaue mihatag og P17 milyunes isip dugang budget sa Department of Education (DepEd) Division of Mandaue City alang sa pag-ayo sa mga tunghaan, labina sa lima ka mga primary ug secondary schools nga nadaut sa bagyong Odette.
Si Nimfa Bongo, superindente sa DepEd Mandaue Division, nibutyag kagahapon, Agusto 17, 2022, nga ang kuwarta gikan sa Special Education Fund (SEF) supplemental budget sa Dakbayan.
Ang pagpahibalo bahin sa dugang pundo human si Bongo ug ubang personnel sa DepEd Mandaue nakigtagbo kang Mayor Jonas Cortes niadtong Lunes, Agusto 15, 2022.
Si Bongo nagkanayon nga ang dugang pundo gigahin alang sa Mandaue City Comprehensive National High School (MCCNHS), Pagsabungan Elementary ug National High Schools, Labogon National High School, ug Maguikay Elementary School.
Dugang ni Bongo, ang mga tunghaan grabeng nadaut ni Odette sa Disyembre 16, 2021, labina ang MCHS nga nangalangkat ang atop diin ang pag-ayo mogasto og P7 milyunes.
Sa miaging Marso, ang Dakbayan nigahin og P20 milyunes sa pag-ayo sa 14 ka elementary ug high schools.
Ang DepEd-Central Visayas niila sa mga tunghaan sa Mandaue nga nadaut sama sa Tingub, Casili, Maguikay, Umapad, Banilad, Cabancalan II, Tabok I ug II, Bakilid, Canduman Elementary Schools, Labogon ug Pagsabungan.
Si Councilor ug chairman sa committee on education Malcolm Sanchez niingon nga ang P20-million budget dili maigo sa pag-ayo sa mga tunghaan, kay mogasto tanan og P60 milyunes.