DISISYETE ka mga lugar sa Davao City ang nakasianti og pagkapawong sa dagitabnon (power outages) tungod sa kusog nga bundak sa ulan niadtong Martes sa gabii, Agusto 16, 2022.
Sa service advisory nga gipagawas sa Davao Light and Power Company (Davao Light) sukad alas 2:32 sa hapon Miyerkules, Agosto 17, nabalik na ang suplay sa kuryente sa 10 ka mga lugar: Fatima Village; Garcia Heights; Mineral Village; Montfort Village, Bajada; Villa Park Subdivision, Buhangin; Gem Village, Maa; Northcrest, Buhangin (Broken secondary line); Biao Eskwela; Las Terrazas Subdivision, Maa; ug Royal Pines, Matina.
Samtang padayon pang gipaningkamutan ang pagbalik sa dagitab sa Catalunan Pequeño, Belisario Village, ug P-1 Barangay Inayangan human nga dunay kahoy nga natumba. Parsiyal na sab nga nabalik ang suplay sa Belisario.
Ubang lugar sa siyudad nga naputol ang primary lines, naglakip sa Chula Vista, Cabantian; Holy Trinity Village, Buhangin; ug Uyanguren. Kining maong mga lugar nagkinahanglan og daghang personahe aron nga mabalik ang suplay sa kuryente.
Samtang ang Ladislawa Village sa Bacaca Road nakasinati og pagkapawong sa suga human duha ka poste natumba.
Sa pahayag sa Davao Light, gikanayon nga kasamtangan nilang gitrabaho ang pagkapawong sa suplay tungod sa kusog nga ulan.
Gipasalig sa kompaniya ngadto sa ilang mga konsumante nga ilang ibalik ang kuryente sa mga naapektuhan nga lugar kon makita na ang mga hinungdan.
Kadtong nakasinati og pagkapawong sa suga, nagpahinumdom ang Davao Light nga mahimong tawagan sila o magpadala og mensahe pinaagi sa ilang account ID, contact person, ug contact number.
Gisulayan sa SunStar Davao sa pagkuha pa og dugang impormasyon pinaagi sa pagtawag ngadto ni Davao Light Reputation Enhancement Department manager Fermin Edillon apan wala pa siya mitugot nga mahinabi.
Nasayran nga bandang alas 9:45 sa gabii niadtong Martes sa gabii, usa ka kahoy ang natumba sa Shrine Hills tungod sa hangin nga miresulta nga di na maagian ang dalan sa mga motorista. Dali gilayong milusad og clearing operations ang Davao City Central 911.