NASIKOP ang usa ka call center agent sa Davao City atol sa entrapment operation sa Regional Anti-Cybercrime Unit 11 ug Sta Ana Police Station 1 alas 8:40 sa gabii, Agosto 15, 2022, sud sa Queensland Inn sa Dacudao Avenue, Barangay 20-B, Siyudad sa Davao.
Kasong pagsupak sa Republic Act (RA) 9995 kun Anti-Photo and Video Voyeurism Act of 2009 ug RA 9165 kun Comprehensive Dangerous Drugs Act of 2002 ang ipasaka batok sa suspek.
Giila ni Police Lieutentant Ronald Lao ang suspek nga si alyas Alvin, 43, taga Barangay Talomo Proper, Davao City.
Sumala ni Lao, gireklamo ang suspek sa iyang kanhi uyab tungod sa pagpanghadlok niini nga i-upload online ang ilang sex video ug mga hubo nga larawan
Human sa pagpanghulga sa suspek, gilayong nagpatabang ang biktima sa kapulisan nga miresulta sa malampusong pagkasikop sa suspek.
Atol sa operasyon, nakuhaan sa awtoridad og lima ka mga pakite sa gituohang shabu ug mga drug paraphernalia ug ang upat ka mga flash drives ug duha ka mga SD cards.
Depensa sa suspek, gusto lamang niyang magbalik siya sa iyang kanhi uyab, apan dili na suma pa sa babaye gumikan misulod na sa ilegal nga buhat ang suspek.