Hepe sa kapulisan sa dakbayan sa Talisay, Police Lieutenant Colonel Randy Caballes, nipahibalo nga lima ka mga grupo sa mga gang nga sagad sa mga miyembro menor de edad ang ilang gipanid-an karon ug gisubay ang profile sa matag grupo, lakip sa pag-ila kinsa ang mga lider.
Matud ni Caballes, tumong sa ilang pagkuha sa mga ngalan sa nangulo sa mga gang mao usab ang pagbisita sa mga ginikanan sa mga miyembro niini.
Nadiskubrehan sa kapulisan sa nahisgutang siyudad nga nagsugod na usab sa pagtapuk-tapok ang mga batan-on ug posibleng momugna og kasamok batok sa laing grupo sa mga batan-on.
Kini nadiskubrehan sa mga barangay tanod human nakadakop sa usa ka Renmar Cainap, 18, taga Barangay Lawaan 3, dakbayan sa Talisay.
Si Cainap naabtan sa mga pulis ug tanod niadtong Agusto, 14, 2022, alas 8:30 sa buntag sa Barangay Dumlog nga uban sa panagtapok sa mga batan-on ug kini nakuhaan og kutsilyo.
Nasuta sa kapulisan nga si Cainap sakop sa Batang Maghaway, usa ka grupo sa gang nga mga miyembro niini sagad mga menor de edad.
“Ato pa gi-profile ang name sa mga lider then og mahuman na, that’s the time nga atong ipatawag ang ilang ginikanan,” matod ni Caballes.
Ang Talisay police walay supak sa ilang pag-apil sa maong grupo basta sa kaayohan lang apan, ang nakahatag og dili maayo sa ilang pagtapuktapok mao unya ang sinugdanan sa kagubot hinungdan nga karon pa lang pakgangon na.
Usa sa tumong usab sa kapulisan sa hugot nga pagpatuman sa curfew sa dakbayan labi na nga duol na ang pagsugod sa tingklase ning buwana.
“Mao ni nga ang usa gyud sa hinungdan nganong naa ning implementation sa curfew kay hapit naman ang pagsugod sa klase kining mga bataa mag-abut-abot ni sa eskwelahan daghan gyud ang mahitabo ani, kon walay curfew, mag-abot gyud ni sa gawas sa dis oras sa gabii,” dugang ni Caballes.
Nagplano usab si Caballes nga makig-alayon sa mga magtutudlo sa mga eskwelahan sa siyudad aron mapaabot niini ang ilang katuyoan ug matabangan ang school officials sa ilang pagpatuman sa kalinaw. Una nang nakig-uban ang PNP sa unang adlaw sa Brigada Eskwela.
Sama sa dakbayan sa Sugbo, hugot nga gipatuman ang pagbalik sa curfew sa mga batan-on human namatikdan ang krimen nga naglambigit sa mga menor de edad.
Ang mga barangay aktibo nga nakig-alayon sa kapulisan sa dakbayan sa pagpahipos sa mga batan-on sugod sa alas 10:00 sa gabii hangtod sa alas 4:00 sa buntag.