Bana, kabit nasikop

Usa ka sikat nga lady vlogger ug ang iyang uyab nga minyo nasakpan sa asawa sulod sa balay sa babaye sa Fuentes Road, Barangay Pajac, dakbayan sa Lapu-Lapu, alas 10:30 sa gabii, sa Martes, Agusto 16, 2022.

Ang 29 anyos nga asawa nagpuyo sa dalan Opal, Barangay Mabolo, siyudad sa Sugbo, maoy nipadakop sa duha nga giingong nagpuyo sa usa ka balay sa naasoy nga dapit.

Pinasikad sa citizens’ arrests, giposasan sa mga barangay tanod mao ang bana nga nag-edad og 34, lumad nga taga Candanay Sur, lalawigan sa Siquijor ug ang vlogger nga giingong kabit nga nagpangidaron og 37 anyos.

Ang duha, kinsa parehong mahiligon sa motorsiklo, gidala sa Station 2 sa Lapu-Lapu City Police Office (LCPO).

Sumala sa kapulisan, natultolan sa asawa ang gipuy-an sa duha tungod sa ilang posts sa Facebook ug pipila ka mga saksi nga kanunay makakita sa duha nga mag-uban ug magkuptanay og kamot.

Si Police Staff Sergeant Phoebe Rose Pepito sa Women and Children’s Protection Desk (WCPD) sa Station 2 sa LCPO, nibutyag sa Superbalita Cebu nga ila nang napasaka sa korte ang kaso nga concubinage batok sa duha nga kasamtangang gitanggong sa ilang selda.

Apan, sumala ni Pepito, ang duha igo lang nipagawas og pamahayag nga ilang tubagon sa hukmanan ang akusasyon batok kanila uban sa ilang abugado.

Sumala sa Philippine Commission on Women, ang bana nga nag-atubang sa naasoy nga kaso mahimong masilotan og unom ka buwan ug usa ka adlaw ngadto sa maximum nga upat ka tuig ug usa ka adlaw ug katugbang nga multa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph