MALIPAYON ang mga Tricycle Operators and Drives Association (Toda) ug ang mga nagkalaing non-medical frontliners human nila nadawat ang ayuda nga salapi nga gipangunahan ni First Congressional District Representative Paolo Duterte, diin ang maong programa nagpadayon karon sa mga kabarangayan sa Distrito Uno sa Davao City.
Sa inisyal nga datus dunay 577 ka mga masahista, 9,950 ka mananagat, ug 11,049 ka mga drayber ug operator ang gilauman nga makakuha sa Tulong Panghanapbuhay sa Ating Disadvantaged/Displaced Workers (Tupad) payout.
Ang mga benepisyaryo nga nakadawat na sa cash mao ang Toda drivers ug operators gikan sa Barangay Catalunan Grande, Catalunan Pequeño, Bucana, ug Barangay 1 hangtud 40 diin ang wala pa, mosunod na kini sa pipila ka mga adlaw suma sa buhatan sa kongresista.
Ang Tupadd usa ka community-based package of assistance nga nagtanyag ug emergency services para sa mga bakwit, kulang sa trabaho ug seasonal nga mga trabahante sulod sa minimum nga 10 ka adlaw apan kapin sa 30 ka adlaw, depende sa matang sa ilang trabaho.
Si Representative Paolo Duterte sa pakig-alayon sa Department of Labor Employment sa Davao Region (DOLE–Davao) nag-organisar sa pag-apud-apod sa hinabang didto sa People's Park ning siyudad sa ilang tinguha nga matabangan ang mga benepisyaryo nga makabangon gikan sa Covid-19 pandemic.
Naglaum ang magbabalaod nga ang programa sa Tupad makatabang sa mga pamilya sa mga benepisyaryo sa panahon sa kalisdanan, ug nagdasig kanila nga padayon nga suportahan pinaagi sa mga paningkamot sa gobyerno. (Jeepy P. Compio/Davao City 1st Congressional District)