ANG City Social Welfare and Development Office (CSWDO) niawhag sa mga senior citizen sa pag-andam sa ilang mga kinahanglanon alang sa tinuig nga cash grant.
Si CSWDO Head Atty. Marlisa Gallo sa pakighinabi sa Davao City Disaster Radio niadtong Lunes, Agosto 15, 2022, niingon nga ang ilang buhatan mag-andam sa masterlist sa mga senior citizens.
Sumala sa opisyal nga kinahanglan ang mga senior citizens mag-andam sa ilang Office of Senior Citizens Affairs (Osca) ID, Voter's Registration, ug membership sa organisasyon sa senior citizen gumikan kini ang mga bag-ong rekisitos nga gimando sa Ordinance No. 0954-22 kun mas nailhang "The Amended Annual Financial Assistance to All Qualified Senior Citizens Ordinance of Davao City".
Ang maong ordinansa nagpalapad sa grupo sa mga senior citizen-beneficiaries nga naglakip sa mga 60-anyos, diin ang annual cash grant nagkantidad og P1,500 ngadto lamang sa 65-anyos pataas.
"Ang 60 apil na siya pero wala pa nabudgetan, ang mahitabo ani basin next year na makadawat pero ang segurado, maapil na siya sa atoang annual subsidy," ingon ni Gallo diin ang ordinansa nagmando sab nga ang payout pagahimuon matag bulan sa Nobyembre.
Ingon pa sa opisyal nga ang mga kwalipikado nga mga edaran kinahanglan nga magsugod og sayo sa pagproseso sa ilang Osca ID.
"Dapat mohawid ka sa Osca ID nga issued sa Davao City, kon Osca outside sa Davao dili dawaton. Kon nawala ang inyong Osca ID, maghinay-hinay na ta og lihok-lihok para makapangayo ta og mga bag-o nga Osca ID," ingon ni Gallo.
Dugang pa niya nga gawas sa Osca ID, kinahanglang rehistrado usab sila nga botante sa Davao City.
"Kinahanglan gyud ni karon nga ang senior apil gyud sila sa list of registered voters, dili sufficient nga i-present ninyo sa amoa inyong voter's ID pero na-delist diay ka sa list of registered voters," ni Gallo.
Ang mga senior citizen nga bedridden nga 75-anyos ug wala sa listahan sa mga certified voters mahimong makapresentar og certificate of residency sulod sa labing menos lima ka tuig nga giisyu sa barangay nga ilang gipuy-an.
Kadtong mga senior citizen nga adunay mga kakulian ug dili rehistrado nga mga botante mahimo usab nga mopresentar sa ilang mga person with disability (PWD) ID nga giisyu sa Davao City.
Kinahanglan usab nga miyembro sila sa usa ka organisasyon nga giila nga senior citizen nga giila sa Osca ug CSWDO.
"Kinahanglan member na gyud sila sa organization karon," ingon ni Gallo.
Dugang ni Gallo nga daghang mga senior ang dili miyembro sa mga organisasyon ug gitugotan nila kini sa miaging duha ka tuig tungod sa pandemya apan karong panahona, tungod kay kadaghanan nabakunahan ug klaro ang mga protocol sa Covid, kinahanglan nga magpalista na sila para sa usa ka senior citizen.
Moadto sila sa mga organisasyon sa mga edaran o mahimo silang mag-organisa og organisasyon sa mga senior citizens. Aron mailhan, ang organisasyon sa senior citizens kinahanglan nga mosumite sa mga kinahanglanon ngadto sa social worker sa distrito.
Ang solundon nga gidak-on sa organisasyon mao ang 15-50 ug kini giisip nga igo tungod kay adunay pipila ka mga komunidad nga adunay gamay lamang nga mga senior citizen.
Ingon ni Gallo nga ila na karong gitrabaho ang masterlisting sa mga senior matag barangay nga gimando sa giusab nga ordinansa. (PR)