Giimbestigar na karon kon si kinsay nagsugo sa pag-issue sa Sugar Order No. 4 nga suma pa nagsugo nga mopalit gikan sa gawas sa nasud og 300,000 metric tons nga asukar dugang sa napalit na niadtong Mayo. Suma sa Malacañang nga iligal ang maong authorization.
Gipirmahan kini ni Agriculture Undersecretary Leocadio Sebastian.
Tungod niini mi-resign sila si Sebastian, Sugar Regulatory Administration (SRA) chief Hermenegildo Serafica ug Board Member Roland Beltran.
Siya maoy representante sa sugar millers sa board. Ila lang ba gyud ang pagbuot nga mopalusot sa maong Sugar Order No. 4 nga walay nagsugo kanila nga mas dako og ranggo?
Samtang ang uban nagtuo nga adunay dakong tawo sa Palasyo nga maoy nagsugo kanila.
Si Senate President Juan Miguel Zubiri nagtuo nga natintal kining mga tigpayuhot sa dakung salapi nga ilang makita gikan niini.
Sumala ni Senate President Zubiri nga ang iyang tinubdan mipahibawo kaniya nga mangayo kini sila og “tongpats” kun suborno nga gikan sa P50 ngadto sa P100 matag bag sa imported sugar.
Unya kining 300,000 metric tons sa asukar bali og six million ka bags. Sa tag P50 matag bag makadawat sila og P300 million.
Sa P100 matag bag, duna silay kitaon nga P600 million.
Sumala ni Pres. Ferdinand “Bongbong” Marcos, nga mopalit gihapon ang Pilipinas og 150,000 metric tons sa Oktubre. Iyang giklaro nga way kakuwang sa asukar karon dinhi sa nasud.
* * *
Bag-o lang gani gisugdan ang pag-imbestigar sa pagsuway unta pagpalit og 300,000 metric tons sa asukar, dia na say buot ipalusot nga white onions o puti nga sibuyas bombay nga balor og P36 million sa Misamis Oriental nga gi-misdeclare nga “spring roll patti” ug “plain churros.”
Nagtuo si Senador Imee Marcos nga walay kuwang sa white onions sa nasud. Suma ni Senador Marcos nga ang una nilang buhaton mao ang pag-smuggle.
Sunod ilang ipatuo nga adunay shortage, unya maghimo dayon sila og import permit. Human niini iladlad na dayon nila kining gipalusot nga mga butang.
* * *
Uyon kaayo ako sa gihimo ni Mayor Mike Rama nga wala pagpagamit sa Landbank cash card alang sa pagkobra sa financial assistance alang sa senior citizens.
Bisan tuod og lisud alang kanamo nga moadto sa barangay gym ug molaray aron pagkuha sa financial assistance, apan nakasabut ko sa tumong ug tuyo sa mayor nga mao ang pagpugong niadtong mga sakop nga nangamatay na o kaha dili na kwalipikado nga modawat sa financial aid.
Dili angay tuhoan nga dili na kuno gamiton ni Mayor Rama ang cash card kay kang anhing mayor Labella kini ug nga buot kuno ang mayor nga maghimo siyag bag-o nga siya ang mopirma.
Hinaut pang mobalik na usab ang pagpagamit sa cash card sa sunod nga higayon. (mannyrabacal1144@gmail.com)