Drug surrenderer nga taga Sityo Kasagingan, Barangay Lawaan 3, dakbayan sa Talisay gitipi sa Sityo Campinsa, Barangay Manipis, bukirang dapit sa siyudad.

Sa interview kang Police Lt. Colonel Randy Caballes, hepe sa Talisay City Police Station, nadawat nila ang maong taho alas 10:55 sa gabii sa Agusto 17,2022, apan ang pagpamusil niana pang mga alas 9:30 sa gabii tungod sa ka layo sa dapit nga nahitaboan.

Ang biktima giila nga si Raymond Tabanas Nadera, 22, taga Sityo Kasagingan, Barangay Lawaan 3.

Matud ni Caballes nga ilang nasayran nga si Nadera gikuha og mga tawo nga nagmotorsiklo mga alas 6:00 sa gabii sa ilang balay sa Barangay Lawaan.

Dugang ni Caballes nga duha ka posibleng anggulo ang ilang tan-awon karon nga maoy motibo sa pagpatay.

Una ang personal nga bangi o di ba kaha drugas.

“Mao ni atong gi focus sa imbestigasyon kon unsay motibo sa pagpatay sa biktima,” matud ni Caballes.

Lakip nga sutaon sa kapulisan kon unsay mga transaksiyon niini sa Sityo Campinsa sanglit layo man ang dapit gikan sa Barangay Lawaan 3.

Si Nadera nakaangkon og ubay-ubay nga mga samad pinusilan.

Ang amahan sa biktima nga si Renzo niangkon nga tiggamitan ang iyang anak og illegal drugs.

Dugang sa amahan nga nagtuo siya nga kaila ra sa iyang anak ang nagdala kaniya kay nisakay dayon sa motorsiklo.

Matud ni Caballes nga subay sa ilang pagsusi sa record sa ilang data base, si Nadera usa ka drug surrenderer sa 2016, diin niadtong panahona menor de edad pa siya.

Sa 2017, duna kini kaso nga kalapasan sa paghupot og armas samtang nadakpan usab sa kaso nga ilegal nga drugas niadtong 2018.