Grupo sa mga kawani sa Metropolitan Cebu Water District (MCWD) nanawagan sa pagluwat sa tanang board of directors tungod sa ilang kabalaka nga ang government-owned utility provider mahimong pribado tungod sa dili maayong pagdumala niini sa miaging duha ka tuig.
Ang MCWD Employees Union (MEU) nihimo og press conference sa Cebu Business Hotel sa dakbayan sa Sugbo kagahapon, Agusto 18, 2022, nga nagkanayon nga ang “corporate health is in critical condition.”
Si MEU President Abigail Almeria niingon nga ang kita sa MCWD nitiurok og 62 percent, samtang ang water supply nga nausik niabot og 30 percent.
Sa data nga gipresentar ni Almeria, ang P211.35 million income sa MCWD sa 2019 nikunhod ngadto sa P34.27 million sa 2021.
Ang kantidad sa non-revenue water nitubo og 23.66 percent sa 2019 ngadto sa 30.05 percent sa 2021, dugang ni Almeria.
Sumala ni Almeria, sila nakadawat og unverified reports nga atol sa pagsaka sa taas nga kaso sa pandemiya ug human sa bag-ong Odette sa Disyembre 16, 2021, ang tubig nga ihatag nga libre sa naapektohang mga molupyo, apan gipabayran kini.
“Naa pa gyud mi na dunggan, kini siya unverified, nga dunay mga specific nga mga tawo nga dunay resorts ug restaurants nga ilang hatdan,” matod ni Almeria.
Si Almeria nisaway sa Hunta nga nibubo og minilyon sa pagpamalit og sakyanan imbes pag-ayo sa mga nadaut nga linya sa tubig nga magpaubos sa percentage sa non-revenue water.
“Unya ang MCWD sigeg pamalit og sakyanan... Daghan kaayong sakyanan nga wala mi kasabot nga ang funds imbes adto i-develop sa (water) source ug sa pag ayo sa mga guba nga pipes... tua namalit og sakyanan ug generator sets nga dili magamit kay inig andar kuwang ang power,” matod ni Almeria.
Ang MEU nisaway usab sa pagpanghilabot sa Hunta sa hiring process sa employees sa water district ubos sa ilang personal nga interes.
“Ang gipasulod gikan og City Hall, silingan ra sa MCWD. So nakita namo nga duna siyay mga pag intervene sa hiring,” dugang ni Almeria.
NO PRIVATIZATION
Sa linaing pakighinabi, si MCWD chairman Jose Daluz III niangkon sa pagkunhod sa kita sa miaging duha ka tuig apan wala kini nagpasabot nga timaan sa privatization sa pasilidad.
Matod ni Daluz, kinsa abogado, ang pandemiya ug bagyong Odette dako og epekto sa ilang kita.
Apan ang kita sa water district dili problema samtang ang MCWD makahatag og maayong serbisyo sa mga konsumidor, sumala ni Daluz sa Sunstar Cebu.
“Kaning mga private sector nga nakahatag namo og bulk water, amo man sad butangan og kontrata nga dili gyud sila mo compete sa MCWD. They will not put distribution pipes. I think that will strengthen that MCWD will just be here as a government-owned corporation,” matod ni Daluz.
Bahin sa panawagan sa unyon sa pagluwat niya, si Daluz nagkanayon nga naa sa mga opisyal sa Kagamhanan sa Dakbayan nga nagtudlo kaniya sa pagdumala sa water district.
“It is really for the people who put us here og satisfied ba sila. As far as we are concerned, bias man gyud kaayo mi kay kami man ang nahitungdan. Well, mapaagas namo ang Lusaran (Bulk Water Project) karong September... I believe that we are working hard for MCWD, for our water nga moagas,” dason ni Daluz sa Sunstar Cebu.