Pito ka mga balay ang nangaugdaw sa sunog sa Sityo C. Padul Uno, Barangay Duljo Fatima, Siyudad sa Sugbo kagahapon sa hapon, Agusto 18, 2022.
Si FO2 Fulbert Navarro sa Cebu City Fire Office (CCFO) nibutyag nga nagsugod ang kayo sa panimalay sa usa ka Maria Salome Fernandez sa sudlonong bahin sa sityo.
Matod ni Navarro, ilang nadawat ang maong alarma sa alas 2:32 sa hapon samtang sa alas 2:36, gisaka sa unang alarma ang sunog ug pagka alas 2:46 sa hapon, gideklarar nga kontrolado na.
Ang CCFO nibana-bana sa danyos nga moabot og P330,000 samtang usa ang samdan. Matod ni Navarrro usa ka 3 anyos nga bata nga apo sa tag-iya sa balay nga unang nasunog naangol.
Sa imbestigasyon sa kabomberohan sa hinungdan sa sunog, nahibaloan nga dunay mga bata nga nagduwa og posporo nga matud pa maoy niduslit sa kayo apan, dugang imbestigasyon ang himuon sa CCFO aron pagkompirmar niini.