Nahugno ug nakasinati og depresyon ang asawa human sa kalit nga pagbiya sa iyang bana ug niuban sa sikat nga lady vlogger.
Ang lady vlogger nga si Maria Charlette Dyrit, 37, naila nga motorcycle vlogger nga “TCH Diva” uban ni Allan Pabingit, 34, bana sa reklamante, nasikop sa balay sa babaye sa Fuentes Road, Barangay Pajac, dakbayan sa Lapu-Lapu, alas 10:30 sa gabii, sa Martes, Agusto 16, 2022.
Ang asawa nga si Pamela Theresa Pabingit, 29, taga dalan Opal, Barangay Mabolo, siyudad sa Sugbo, niasoy sa Superbalita Cebu kagahapon, Agusto 18, 2022, nga wala sila nagbuwag sa iyang bana ug natingala siya sa kalit nga pagbiya nga walay pananghid kaniya.
Matod ni Pamela, nagsugod ang iyang pag-antos sa pandemiya sa Marso 2020 dihang nawad-an og trabaho ang iyang bana ug nagsugod ang ilang away.
Dugang niya nga nihangyo siya sa iyang bana nga tabangan sa galastuhan sa panimalay tungod kay iya na lang ang tanang lihok hinungdan usab nga ang iyang negosyo nga laundry naundang.
Apan, dason niya, ang iyang bana sama sa wala naminaw apan kini nilarga sa gawas sa nasud isip usa ka seaman.
“Actually, Sir, nianang March 22,2021 nag-estoryahay pa mi nag-video call mi, natingala man lang ko pagkaugma nilarga naman sa gawas nga walay pananghid,” dason sa asawa.
Gikan sa paglarga niadtong Marso 2021, hangtud sa pagkadakop niini, walay komunikasyon ang magtiayon.
Dugang ni Pamela, nasayran lang niya nga niuli kini sa Disyembre 2021, nibalik sa gawas sa nasod sa samang buwan ug niuli na usab pagbalik sa Hunyo 2022.
Gikan niadto wala gihapon niuli ang iyang bana sa ilang panimalay sa Mabolo.
Niabot ang punto nga dunay usa ka wala nagpaila nga babaye nga nihatag kaniya sa mga impormasyon ug mga hulagway sa iyang bana nga dunay laing gikauban nga babaye.
Ug niini, giplano ni Pamela ang mga pamaagi nga masakpan sila hinungdan nga nagpakuyog siya og mga tanod sa Barangay Pajac sa Lapu-Lapu City ug gihimo ang pagdakop pinaagi sa citizen’s arrest.
Matud ni Pamela, human sa pipila ka tuig niini nga pag-antos, nakaginhawa na siya karon og gamay dihang nakita nga napriso na ang duha human napasakaan og kaso.
Unang nahinabi sa Superbalita Cebu sa Miyerkules, Agusto 17, si Police Staff Sergeant Phoebe Rose Pepito sa Women and Children’s Protection Desk (WCPD) sa Station 2 sa LCPO, nga ila nang napasaka sa korte ang kaso nga concubinage batok sa duha.
Apan, sumala ni Pepito, ang duha nga natanggong sa ilang selda igo lang nipagawas og pamahayag nga ilang tubagon sa hukmanan ang akusasyon batok kanila uban sa ilang abugado.