Hingpit nga gilangkat sa Alagad Dumangjug ang kampiyonato sa 1st Mayor Fritz Lastimoso Inter-town Invitational Open pinaagi sa paglubong sa Sibonga, 76-52, sa champioship match Miyerkules sa gabii, Agusto 17, 2002 sa Alcantara Civic Center sa lungsod sa Alcantara, Cebu.
Gawas sa championship trophy, ang Dumanjug misakmit usab sa P100,000 nga ganting salapi samtang P75,000 usab ang nabulsa sa runner-up nga Sibonga.
Wa makasinati og kakulba ug kalisod ang Dumanjug nga gibituonan nila ni kanhi PBA mainstay Jojo Tangkay ug Joseph Nalos kinsa maoy nahimong most valuable player sa usa ka buwan kapin nga torneyo.
Sa first half, nakahatag pa og igong kombati ang Sibonga nga gipangulohan ni Adrian Lao nga gani nakaposte pa kini og labaw sa sayong bahin, 12-10. Apan kini maoy katapusang higayon sa Sibonga sa paghupot sa bintaha.
Ang short jumper ni Nalos maoy nagsira sa first half, 43-31.
Didto na sa second half misulbong og maayo ang labaw sa Dumanjug, 50-36, ug ang 11-2 nga rally nga giduslitan sa tres ni Tangkay maoy mipabukhad og maayo sa ilang agianan paingon ngadto sa kadaugan, 61-40.
Ning higayona ang siyagit nga daog na!....daog na!... maoy milanog sulod sa Civic Center nga gidasukan sa mga basketball aficionados nga naglakip ni Alcantara Mayor Fritz Lastimoso ug vice mayor Larry Llenos uban sa ilang pipila ka mga opisyales.
Sa sayo pa, yano ra usab nga gisakmit sa Barili ang third place honor pinaagi sa pagkastigo usab sa Malabuyoc, 97-85.
Ang torneyo nga gidumala ni Alcantara Sports commissioner Rey Canoy gisalmutan sa dose ka mga teams gikan sa nagkalainlaing lungsod ug gisugdan niadtong sayong bahin sa Hulyo.
Gawas sa LGU, si Mayor Lastimoso mapasalamaton usab kaayo sa mga private sector nga miitsa sa ilang hugot nga pagsuporta sa mga kalihukan nga gipahaom alang sa kasaulogan sa kapistahan sa maong lungsod.
Kini sama sa GMTech Wireless Internet Services, T & L Refilling Station, FJK Studio Production Mangga Spring, Jump+Dive+Gear-up, JDG Travel and Tours, Lolli Gummies and Candies.
Mipaluyo usab ang Gad Printing Services, Phenommenal LRB Sound Production Services, OdontoKraft Dental Clinic, AF Furniture, Learn 'n Green Business ug J&V Frontliners. (JBM)