Normal ra sa mga relasyon ang lalis ug away labi na kon di magkasinabot ang partido unya mauli sa lantugi.

Diay mga ground rules nga akong ipa-ambit aron di mosamot og ulbo ang kaspa sama sa bulkang kabutuhon.

Una, ayaw gayod pag-away atubangan sa publiko nga daghang tawo. Hunahunaa pagkahuman sa inyong away ug siniyagitay kamo ra gihapon ang matunaw sa kauwaw.

Kalagmitan kon magpadala ta sa atong gibating kasuko, mawad-an sab ta og panimuot ug uwaw unya deritso og panghambat sama sa irong buang. Di sab kini maayong ehemplo labi na atubangan sa mga batang nagtan-aw.

Sunod, paninguhaa nga mahusay ang away una matulog kay kon molungtad kini og tibuok adlaw, labi na kon magbungol, mosamot hinuon ka grabi ang sitwasyon kay nagdilaab naman ang gibati sa nag-umidong dughan.

Angay husayon ug estoryahan ang panagbangi una mosawop ang adlaw para maka move on.

Likayan sab ang pagpunay og balikbalik og lugit sa mga nangaging isyu. Ilubong na sa kalimot ang mga bati ug pait nga nanglabay ug di na kini balik-balikon pa paghisgot. Past is past matod pa maong angay na isira ang libro.

Ikatulo, ayaw pakiglalis kon hubog imong pares kay tataw kaayo nga wa kay makuhang klaro ug seryusong solusyon o tubag kay wa man ni sila sa ilang normal nga pangisip. Mas maayo pang ikatulog lang una hangtod mahuwasan kay segurado ko nga wa kini mahinumduman sa imong gustong ipaabot o isyong ihusay.

Sunod, palayo una temporaryo para magpabugnaw kay kon puro init mong duha, magsegi na lang og siniyagitay unya way klarong husay ang makab-ot. Kon bugnaw na ang ulo ug pagbati unya kamong duha kalmado na, diha na magkukabildo og balik.

Ika lima, ayaw pagbungat og mga pulong o desisyon nga tapuson na (wag magsalita ng tapos) kay kita ra man gihapon ang magmahay sa katapusan. Dako ang posibilidad nga makabungat og di mao kon ang emosyon mas taas kaysa pangisip.

Sa katapusan, ayaw apila o pangangin sa ubang tawo nga way labot sa inyong isyu para di kini mosamot ka dako.