Gipusasan ang usa ka amahan sa mga sakop sa Criminal Investigation Detection Group (CIDG) Cebu Field Unit nga nag-serve sa warrant of arrest sa alas 6:00 sa buntag sa Biyernes, Agusto 19, 2022, sa Barangay Carreta, siyudad sa Sugbo tungod sa kaso nga pag-abuso sa anak.
Si Larry (dili tinuod ngan), 35, gipukaw sa awtoridad atol sa pagsilbi sa warrant sayo sa buntag. Siya gipasakaan og kaso sa iyang 10 anyos nga anak nga lalaki nga giingong biktima sa pagdagmal.
Si Judge Ester M. Veloso sa Branch 06 sa Regional Trial Court (RTC) Cebu City maoy niluwat og warrant of arrest nga pinitsahan og Enero 14, 2022 ug nitugot nga makapiyansa og P80,000 sa kasong kalapasan sa R.A. 7610 o Special Protection of Children Against Abuse, Exploitation and Discrimination Act.
Si Police Lieutenant Colonel Joey Caisem, hepe sa CIDG Cebu City Field Unit, nibutyag nga ang dinakpan anaa na sa listahan sa ikalima nga most wanted sa probinsiya sa Sugbo.
Sa dugang taho nga nakuha kalabot sa mga impormasyon ni Larry nga duna siyay kaso niadtong 2016 nga physical injuries apan iyang naserbisyohan na samtang sa nakalabay nga duha ka mga tuig, nag-atubang na usab kini og mga kasong kalapasan sa paghupot ug pagpamaligya sa gidiling drugas.