Usa ka opisyal sa Consolacion Public Market nipasidaan sa mga konsumidor nga magmatngon batok sa malimbungon nga mga tindera nga nagnegosyo gamit ang depektuso nga timbangan sa ilang mga produkto sa kamerkadohan.
Kini human siyam ka depektoso ug uncalibrated nga weighing scale ang nakuha sa merkado human sa surprise inspection nga ilang gihimo uban sa Consolacion Municipal Police sa Sabado, Agusto 13, 2022.
Si Engr. Richly Marie Sygaco, pangulo sa Public Market, nitug-an sa SunStar Cebu sa Huwebes, Agusto 18, nga dugay na kining maong problema sa merkado hinungdan nga kanunay na silang mohimo og surprise inspection apan nahunong sa 2020 tungod sa coronavirus disease (Covid-19) pandemic.
Si Sygaco niingon nga ang mga timbangan nga nasakmit kay giklasipikar nga depektoso nga adunay guba nga mga piyesa, dili makasunod tungod kay walay mga sticker nga nagtimaan sa pag-calibrate sa timbangan, ug ang uban gi-tamper.
Kini mga timbangana ilabay, matod ni Sygaco.
Dugang pa ni Sygaco nga base sa mga taho nga ilang nahipos, kining mga timbangan kuwang og labing menos usa ka gramo matag kilo, hinungdan nga ang usa ka produkto nga gibaligya sa usa ka kilo motimbang lang og 3/4 gramos sa rehistradong weighing scale.
Sa maong insidente, si Sygaco niingon nga makigtagbo siya sa pangulo sa Consolacion Vendors Association aron makig-alayon ug hisgotan ang maong butang.
Niadtong Hunyo 11 hangtod Agusto 19, sila si Sygaco nakakolekta na og di mominos 20 ka depektosong weighing scales. Kini nga gidaghanon gamay ra sa 2019 kanus-a sila nakolekta og 100 nga depektuso nga timbangan.
Sa nalatid sa municipal resolution no. 128, ang mga mamaligyaay nga makit-ang naggamit og depektosong timbangan multahan og P500 sa unang paglapas, P1,500 sa ikaduha, ug P2,500 sa ikatulong kalapasan.