Gikalipay sa kadagkoan sa Bureau of Jail Management and Penology (BJMP) sa dakbayan sa Carcar, kapulisan ug Philippine Drug Enforcement Agency (PDEA) 7 ang resulta sa greyhound nga walay kontrabandong nasakmit sulod sa mga selda, alas 6:00 sa buntag sa Biyernes, Agusto 19, sa pasilidad sa Takdog, Barangay Poblacion 3.
Si Daryl Tagalog, hepe sa admin and records sa BJMP Carcar, niingon nga ang greyhound giubanan sa 20 ka personnel sa PNP Carcar ug pito ka personnel sa PDEA-7.
Ang BJMP Carcar dunay 270 ka persons deprived of liberty (PDL) diin 160 niini mga lalaki ug 14 ka mga babaye.
Matod ni Tagalog, mandato sa BJMP ang pagpahigayon sa greyhound aron walay drugas ug uban pa sa mga selda.
Gipasabot ni JCINSP Roger P. Daligdig, jail warden, nga kanunay sila naghimo og inspection labi na sa mga mobisita.
Si Police Lt. Col. Ardeolito Cabagnot, hepe sa Carcar Police Station, nalipay sa maong kalamboan ug nipadayag nga nagpakita kini nga luwas ang pasilidad sa BJMP Carcar.
Dugang ni Cabagnot, dunay mga pusher nga madakpan ug nibutyag nga gikan sa mga prisuhan ang ilang kontak sa pagpamaligya og gidiling drugas.