Nagpahimangno ang Land Transportation Franchising and Regulatory Board (LTFRB) sa mga driver sa pasaheroang mga sakyanan sa dakong multa kon sila mag trip-cutting.
Matod ni LTRFB Regional Director Eduardo Montealto nga P5,000 ang multa sa PUJ operator kon ang ilang driver madakpan sa trip cutting.
Kon di mabayran sa operator ang multa, di ma renew ang prangkisa.
Giluwatan kini ni Montealto human daghan og nasikop nga drivers nga nag trip-cutting ang traffic enforcers sa City of Talisay Traffic Operations and Development Authority (CT-TODA).
Si CT-TODA chief Jonathan Tumulak nibutyag nga iyang gitugyan ngadto sa LTFRB 7 ang mga ngan sa kapin 20 ka drivers nga ilang nasikop tungod sa trip-cutting.
Sagad sa mga driver dunay biyahe nga Minglanilla, Naga, San Fernando ug Carcar City.
Kasagaran modagan lang kini gikan sa Brgy. Linao sa dakbayan sa Talisay hangtod sa Brgy. Bulacao sa dakbayan inay nga molahos sa Cebu City ug sa ilang destinasyon sa lalawigan sa Sugbo.
Tungod niini, daghang mga pasahero ang nangatanggong sa karsada kay wa nay kasakyan sa pag-uli.
“Ang uban gikan og south diri ra kutob sa Talisay. Di molahos sa Cebu City, mobalik,” matod ni Tumulak sa Superbalita Cebu.
Dugang usab ni Tumulak nga wa silay pili sa oras sa pagpanakop.
Ila kining gihimo agi og pangandam sa pagbukas sa face-to-face nga klase sunod semana.