PADAYON ang selebrasyon sa Kadayawan Festival 2022 dinhi sa Siyudad sa Davao. Gani karong adlawa, Sabado, ug ugma, Dominggo, mahitabo ang mga dagkong kalihukan isip kinadayagan (highlight) sa kasaulogan nga mao ang Indak-Indak ug Pamulak sa Kadayawan.
Gilauman nga mas modagsang pa ang mga tawo karon sa dakbayan tungod niining maong kalihukan nga duha ka tuig nga wala makit-i sa katawhan, lokal man o langyaw nga mga turista, tungod sa pandemya nga Covid-19.
Kini maoy sagad nga gipaabot sa mga tawo matag saulog sa Kadayawan, gawas sa mga prutas. Apan medyo nihit ang mga prutas karon ug taas ang presyo sa durian gumikan sa kakuwang sa produksiyon kay naapektuhan sa sige og ulan.
Maghugpa ang mga tawo karong adlawa, ilabi na nga kagahapon pa lang daan "non-working holiday" ang Davao City busa taas nga panahon ang gihatag sa Dabawenyo nga makasuroy, ilabi na sa may Magsaysay Park kon diin gihikyad ang tribal houses sa atong mga kaigsuonang lumad ug sa mga malls nga dunay mga kalingawan nga gihikyad.
Apan di nato kalimtan nga magdala og pandong, ilabi na payong o kaha kapote kay nagsige baya og ulan. O ba kaha panagang batok sa kainit sa adlaw aron nga malikay kita sa sakit. Hinumdoman sab nato nga naa pa ang Covid-19, busa mas maayong kanunayon nato ang pagsul-ob sa face mask ug maghugas kanunay sa mga kamot gamit ang tubig ug sabon o ba kaha alcohol.
Apan taliwala sa atong paglingaw karong mga panahona, angay sab kitang mag-amping sa kaugalingon batok sa mga dautang tawo. Ilabi na gyud sa mga kiriwan og kamot kay sagad ni sila naa sa nagtapok nga mga tawo. Likayan nato ang pagdala og daghang salapi o magsul-ob ba kaha og mga mahalon nga mga gamit aron nga di mohatag og pagtagad kanila.
Samtang kon duna man kitay mamatikdan nga kadudahan nga mga butang o kaha mga tawo, itaho gilayon nato kini ngadto sa kapulisan ug kasundalohan.
Maglingaw kita sa kasaulogan apan segurohon sab nato nga luwas kita sa mga dautan aron nga hingpit ang atong kalipay ning mga adlawa.
Happy Kadayawan sa tanan!