Balido ang kabalaka sa Metropolitan Cebu Water District - Employees Union (MCWD-MEU) sa posibilidad nga ibaligya ang government-owned utility provider ngadto sa pribadong kompaniya o grupo tungod sa di maayong pagdumala niini.
Usa sa mga nag-unang rason sa privatization sa mga kompaniya mao ang mismanagement tungod sa kurakot nga nagdumala.
Nauso ang pagmaligya sa kompaniya ug pasilidad sa kagamhanan sa panahon ni kanhi Pres. Fidel Ramos, kinsa bag-o lang nitaliwan, tungod sa iyang pagtuo nga mas molambo kini sa pagdumala sa pribadong pagpanag-iya.
Apan dunay mga akusasyon nga bisan kadtong kompaniya nga maayo ang pagkadumala nalakip sa pagbaligya.
Kon pagdumala maoy nag-unang problema, dili solusyon ang pagbaligya apan pagpatuman sa ngipon sa balaod batok sa kurapsiyon.
Ug ang resulta - mga kompaniya nga kanhi iya sa kagamhanan nagmalambuon na, ug siyempre, ang kita tua na sa bulsa sa usa ka tawo ug pribadong interes imbes masulod unta kini sa panudlanan sa kagamhanan para sa tanan.
Hinuon, makahupay ang pamahayag ni MCWD chairman Jose Daluz III nga niangkon sa pagkunhod sa kita sa miaging duha ka tuig ug nidason nga wala kini nagpasabot nga timaan sa privatization sa pasilidad.
Gitumbok niya ang pandemiya ug bagyong Odette nga dakong epekto sa ilang kita sa water district.
Samtang, kinahanglan nga kontrolado sa kagamhanan ang batakan sa serbisyo, dili lang pinaagi sa balaod, apan pagtukod og nasudnong kompaniya sa pagbalanse sa mga pribadong puhonan o negosyo.
Sa patubig, mapanaminan ang kanhi water facilities sa kagamhanan nga pribado na karon sama sa Metro Manila. Dili ba daghang isyu?
Kon i-privatize, tinuod o dili, ang MCWD humot sa mga pribadong buaya nga nagpahipi ug andam motukob kaniya.