Niadtong Biyernes sa gabii, samtang nanihapon ko sa Sugbo Merkado sa IT Park, akong nakatupad og kaon ang usa ka friendly nga German national. Dali kaayo siyang nakasulti sa iyang obserbasyon nga mas daghan kuno ang ga bike na sa Cebu City, itandi sa nangaging katuigan sa iyang pagbisita dinhi.
Ako siyang gisultihan nga resulta ni sa pandemic kay ang mga tawo mas conscious na sa ilang panglawas. Bitaw, kay ang numero unong pangkombati sa mao nga kagaw ang lig-on nga panglawas.
Matod ni Martin nga ganahan siya sa Cebu kay ang bukid ug dagat duol ra kaayo. Di pareho sa Manila nga mobiyahe ka pa og pipila ka oras una ka makasaka sa bukid.
Ako siyang gisultihan nga nindot kaayo ang Cebu kay duol ra ang kabukiran sa pagsikad sa biseklita. Nipahiyom siya kay steep kuno kaayo ang kabukiran. Ako siyang giingnan nga makaya ra sa hinayhinay nga sikad ang kabukiran. Lisod but di imposible.
Usahay bitaw, kanang maglantaw ko sa kabukiran, bisan ako di makatuo nga nakasaka ko later in life.
Bitaw, nagsugod ko og bike dihang 40 anyos na ko human namatay ang among anak nga si Mary Heart. Nahimo to nakong way of coping. Way imposible kon imong himuon. Di lisod himuon kon duna kay inspirasyon.
PASSION
Kon ganahan ka mobiseklita, ayaw paghuna-huna sa kwarta kay ang returns ini grabe kaayo. Ang imong health maoy una. Ikaduha, ang imong mental health matabangan og maayo taliwa sa grabeng stress karong panahuna tungod sa trabaho ug social media. Bitaw, wa ka kabantay sa epekto sa social media sa imong panghuna-huna, labina kon makabasa ka og toxic posts.
Laing aspeto sa biseklita mao ang pag discover og mga lugar nga kaniadto wa nimo nakita, apan imo nang nasuroy kay nisikad ka. Sama nako, daghan kaayo ko og lugar nga naduaw nga wa nako nakita dihang bata ug hingkod na ko. But tungod sa bike, ako ning naadto. Nakakaon ko sa mga kan-anan nga lami ug dunay specialty.
Mas maka appreciate ka sa nature thru mountain biking. Makapanghupaw ka sa kaanindot sa mga talan-awon sa kabukiran ug kakahuyan nga imong maagian.
YOU WIN FRIENDS
Sa biseklita, daghan kaayo kang mamahimong mga higala. Imo ning makaila, ma meet ug magkahigala mo kay pareho mo og hilig. Mag share na dayon og mga estorya ug uban pa. Dunay bond nga ma develop ug hangtod mamahimong grupo.
Ako bitaw, gikuyogan ko kaniadto sa akong mga higala nga mas una kaayo nako sa biseklita samtang nagkat-on pa ko og climb sa mga bukid. Nagpasalamat kaayo ko kay kon wa pa silay pasensya, nag-inusara ko ug di makat-on kay nang share man sab sila sa ilang mga kaagi sa pagsugod.
Mao na nga alang nako, ang biking is the best exercise kay kinsa may mag ehersisyo nga ang maabot lagyo kaayo. Naka exercise ka na, nakasuroy ka pa. Tanang epekto sa biseklita maayo, gawas lang sa imong panit nga molagom kon di nimo protektahan. Apan mao ra nay imong bantayan. The rest nindot. That is why biking is the best.