Ang San Miguel Beermen ug TNT Tropang Giga magsinikhanay na usab atol sa ilang best of seven series sa 2022 PBA Philippine Cup karong alas 6 sa gabii, Agusto 21 sa Smart- Araneta Coliseum.
Ang duha ka flagship teams adunay gustong pamatud-an sa usag-usa.
Ang San Miguel nga gipanang-iya ni tycoon Ramon S. Ang gustong sakmiton ang labing prestihiyusong kampyonato nga ilang gidominaran gikan niadtong 2014 hangtod 2019 samtang ang TNT ni tycoon Manny V. Pangilinan gusto nga depensahan ang ilang korona.
Si SMB coach Leo Austria nagkanayon nga malisod nga tahas ang ilang sagubangon sanglit ang TNT maoy nag-ali sa ilang agianan apan niining bahina, wala na si Arwind Santos ug Alex Cabagnot apan naa pa sila si Chris Ross, Marcio Lassiter ug 6-time PBA MVP Junemar Fajardo nga maoy nahabilin sa ilang gitawag og “Death Five”.
“Pipilitin namin pero napakahirap. Alam naman natin na ‘yung ‘Death Five’ namin, wala na. We are trying our best to be cohesive. Maraming bagong players. They are still learning how to be a competitive team especially playing the championship,” sulti ni Austria sa spin.ph.
Ang San Miguel maoy top seed sa eliminations bitbit ang 9-2 win-loss record apil na ang 115-99 nga kadaugan batok sa TNT niadtong Hulyo 7. Nagkinahanglan pa sila og pito ka duwa aron idispatsar ang Meralco Bolts para maabot sa finals.
“It’s already in the past. This is the finals. You can never know what will happen. As far as our team is concerned, we are playing for this trophy but it’s not going to be easy. Shortest, four games. Longest, seven games,” dugang ni Austria.
Si TNT coach Chot Reyes, sa laing bahin, nibutyag nga ang pagkadominante sa San Miguel maoy ilang angay nga pangandaman.
“I think the result (in the eliminations) shows the strength of the San Miguel team, how powerful they are, how deep, talented, and well-coached the team is. If we don’t play at our best level, that’s going to happen. Tambak talaga kami dito. Our only chance to be able to compete is for us to consistently play our best. If we don’t do so, that scoreline will be repeated,” matod ni Reyes sa lahi nga interbyu sa spin.ph.
Ang Tropang Giga maoy second seeded sunod sa SMB dala ang 8-3 win-loss record sa eliminations ug nipukan sa Magnolia sa game 6 atol sa semis.
“Hopefully, we can have better preparation and find ways to match the talent of the San Miguel team. Just to be here for us, it’s very special. Really an honor and privilege for us and I speak for the team. We look forward to go to battle against San Miguel,” ni Reyes pa.
Sa maong duwa, ang mga mata makatutok kang Fajardo kinsa, maoy leading scorer ug rebounder apan ang lumad nga taga Pinamungajan, Cebu abagan nilang CJ Perez, Jericho Cruz ug Rodney Brondial nga maoy bag-ong nawong sa prangkisa.