Gatusan ka liboan ka mga Assistance to Individuals in Crisis Situation beneficiaries ang ningdagsa sa mga distribution sites sa tibuok nasod aron makadawat og educational assistance gikan sa Department of Social Welfare and Development (DSWD) sa Sabado, Agusto 20, 2022.
Si DSWD Secretary Erwin Tulfo nipahibawo niadtong Huwebes, Agusto 18, nga ang ahensya mohatag og kinatibuk-ang P500 milyones nga cash assistance, ilabina sa kabos nga mga tinun-an gikan sa elementarya hangtod sa kolehiyo, aron pangandaman ang pag-abli sa klase sugod sa Agusto 20.
Si Grace Yana, usa ka personahe sa DSWD 7 ug team leader sa cash distribution sa dakbayan sa Mandaue, nitug-an sa SunStar Cebu nga ilang gipaabot nga moabot sa 300 ngadto sa 400 ka mga tawo ang nitungha.
Ang kuwarta nga gihatag magkalahi sumala sa lebel sa estudyante: P1,000 para sa grade school; P2,000 para sa hayskul; P3,000 para sa junior ug senior high; ug P4,000 alang sa mga tinun-an sa kolehiyo.
Sa Brgy. Guadalupe, Dakbayan sa Sugbo, sayo pa sa buntag sa Sabado, daghan na ang mga tawo nga nanaglinya sa gawas sa barangay gym. (HIC, hulagway ni Amper Campaña)