Ang pagpahigayon sa face-to-face nga klase sa tanang lebel sa Central Visayas, partikular sa Metro Cebu alang sa school year 2022-2023, nakita nga hagit sa Land Transportation and Franchising and Regulatory Board sa Central Visayas (LTFRB 7).
Mao kini ang gisulti ni LTFRB 7 Director Eduardo Montealto Jr. sa SunStar Cebu sa Sabado, Agusto 20, 2022, o duha ka adlaw sa wala pa ang pag-abli sa klase sa mga pampublikong tunghaan sa elementary ug high school level niadtong Lunes, Agusto 22, diin gipaabot nga mosaka ang gidaghanon sa mga pasahero.
“That’s the challenge actually. Through our table planning enough siya but we will adjust upon the actual start of the expected increase of ridership,” matod ni Montealto.
Matod niya kinahanglan pa nilang ilhon kon asa maggikan ang dakong gidaghanon sa mga tinun-an gawas sa mga tunghaan.
Ang regional director nagkanayon nga usa sa ilang adjustment mao ang pagdugang og units sa public utility vehicles (PUVs) atol sa peak hours ug ingon man ang pagtumbok sa mga rota sa mga lugar nga giila nga adunay daghang mga pasahero.
“Ang existing routes among i-extend ang length para instead of two rides, one ride lang,” dugang niya.