Amahan nga dunay siyam ka mga kaso tungod sa paghimong “sex slave” sa iyang anak sa dakbayan sa Lapu-Lapu, nasikop sa Dumanjug, Sugbo niadtong Biyernes sa gabii, Agusto 19, 2022.
Si Erwin (di tinuod niyang ngan), 40, porter, taga Barangay Calaboon sa habagatang kasadpang lungsod, nasikop sulod sa ilang balay mga alas 8:30 sa gabii.
Ang kapulisan sa dakbayan sa Lapu-Lapu nakig-alayon sa kapulisan sa lungsod sa Dumanjug aron i-serve ang warrant of arrest batok kang Erwin, kinsa gipasanginlan nga nilugos sa iyang anak nga babaye siyam ka higayon gikan sa 2016 hangtod 2018 sa ilang panimalay sa Barangay Gun-ob, dakbayan sa Lapu-Lapu.
Matod ni SSgt. Maria Pilipina Branzuela, investigating officer sa Lapu-Lapu City Police Station, si Erwin way trabaho ug tiggamitan og drugas niadtong panahona ug napugos nga magsalig sa iyang asawa nga nagtrabaho isip security guard.
Matod ni Branzuela nga pugson ni Erwin ang iyang anak nga babaye nga 15 anyos na karon nga makigdulog kaniya samtang nag-duty ang iyang asawa.
Giingong gihulga niya ang iyang anak nga babaye nga dili mosulti kang bisan kinsa kon dili patyon niya siya ug ang iyang inahan.
Niadtong 2020, nitug-an ang biktima sa iyang uyab, kinsa nikomprontase dayon sa amahan ug gipahibawo ang inahan.
“Gi-report dayon sa inahan ang butang sa among istasyon,” ingon ni Branzuela.
Dihang nahibaw-an ni Erwin nga gipasakaan siya og kaso sa iyang asawa, nilayas siya sa siyudad sa Lapu-Lapu paingon sa iyang lungsod.
Niadtong Miyerkules, Agusto 17, si Judge Jose Alfonso Gomos sa Family Court Branch 5 sa dakbayan sa Lapu-Lapu niluwat og warrant of arrest batok sa akusado.
Si Erwin unang gitanggong sa Dumanjug Police Station stockade sa wala pa siya gibalhin sa police headquarters custodial facility sa Lapu-Lapu City.