Gihandom ang mahimayaon nga momento sa Yaw-Yan Ardigma ug ang mga estudyante niini nga nahulma sa disiplina sa martial arts atol sa ika-50 ka tuig nga anibersaryo.
Nagpundok ang mga miyembro sa Yaw-Yan Ardigma niadtong Sabado sa gabii, Agusto 20, sa Yaw-Yan Ardigma Cebu gym sa fourth floor sa Coast Pacific Downtown Center, Sanciangko St. niining dakbayan.
Si Yaw-Yan Ardigma Cebu head Master Benigno “Ekin” Caniga Jr. nagpasalamat kay naabot gyud sa 50 ka tuig ang Yaw-Yan Ardigma ni late founder SGM Napoleon “Nap” Fernandez.
Matod ni Caniga, ang Yaw-Yan Ardigma di lang self-defense kay gatudlo usab kini’g disiplina ug character development sa mga estudyante.
“Ang mga past members nato daghan og successful. Nindot na sila og mga trabaho, ang uban tua sa gawas, ang uban pud gatrabaho sa gobyerno,” saysay ni Caniga sa Superbalita Cebu.
Sa taas nga eksperinsiya ni Caniga sa martial arts, ang iyang pangandoy mao ang makahimo og legasiya pinaagi sa Yaw-Yaw Ardigma Cebu ug makatabang sa kabatan-onan.
Usa ang Yaw-Yaw Ardigma Cebu sa naapektohan sa Covid-19 pandemic kay sulod sa duha ka tuig gidili man ang combat sports. Sa pagbalik sa paugnat sa kusog, ang Yaw-Yan Ardigma mipalapad sa ilang kawsa nga mao ang pagtabang sa grassroots program sa dakbayan.
Ang mga gipang-train sa Yaw-Yan Ardigma nga mga taga Brgy. Day-as gikatakda nga manuwa na sa Batang Pinoy sa Disyembre karong tuiga ubos sa Team Cebu City.
“Kining mga bataa kay apil ni sa atong grassroots training sa Brgy. Day-as. Karon makaduwa na sila og Batang Pinoy,” matod ni Caniga.
Lakip sa mga leksyon sa Yaw-Yan Ardigma mao ang MMA, Muay Thai,/ Kickboxing, Arnis/Eskrima, boxing fitness ug Yaw-Yan Combat (practical self-defense).