Seguradong excited ang tanan, labina sa mga tinun-an, ang pag-abli sa face-to-face (F2F) classses karong adlawa, Agusto 22, 2022, human sa duha ka mga tuig nga modular ug online nga sistema sa pagtuon tungod sa pandemiya sa coronavirus disease 2019 (Covid-19).

Ug goodluck sa tanan, uban sa pag-abli sa School Year (SY) 2022-2023 sa Department of Education (DepEd) mao ang nalantaw nga pagka excited usab sa trapiko sa dakbayan, ginagmay nga kriminalidad sama sa pagpanguot, pagpanglabni ug uban nga misiaw na pagbalik.

Samtang, bisan luag ang Covid-19 status sa dakong bahin sa Sugbo ubos sa Alert Level 1 apan wala hingpit gideklarar nga nawagtang ang pandemiya busa padayon nga hulga ang pagtakboy sa virus taliwala sa daghang nang nabakunahan. Ang mga tunghaan hugot gihapon nga mopatuman sa minimum health standards.

Hinuon, ning unang duha ka mga buwan sa SY 2022-2023, ang hybrid nga sistema nga pwede masagol ang F2F ug online nga depende sa sitwasyon sa matag tunghaan.

Apan si Presidente Ferdinand Marcos, Jr. una nang nipahayag nga ipatuman ang hingpit nga F2F ang mga klase karong Nobiyembre bisan unsa pa ang alert status sa dapit human naapektohan na kaayo ang pagtuon sa mga bata ug kalidad sa edukasyon tungod sa walay tino nga pagtudlo sa modular ug online nga sistema.

Si Bise Presidente ug DepEd Secretary Sara Duterte nipakanaug og kamandoan nga dili una ipatuman ang uniporme sa mga tinun-an aron dili mabug-atan ang mga ginikanan ning panahon nga naghinayhinay pa sa pagbangon ang tanan gikan sa epekto sa Covid-19 ug kalamidad.

Sa unang adlaw sa klase, bisan niadtong wala pa ang pandemiya, normal nga dunay nagtumaw nga problema. Unsa na kaha ning pandemiya pa? Kinahanglan nga taas-taasan ang atong pasensiya. Kalma lang. Mokooperar sa tagdumala sa mga tunghaan ug awtoridad nga nagbantay sa kahusay ug kalinaw ning adlaw nga excited ang tanan.