DUMOT ang gilantaw nga motibo sa mga awtoridad sa pagpang-itsa og improvised explosive device (IED) sa balay sa inilang opisyal sa Moro Islamic Liberation Front (MILF) alas 11:45 sa gabii, Sabado, Agosto 20, 2022, sa probinsiya sa Maguindanao.
Giila ang biktima nga mao si Dahid Datukan, molupyo sa Barangay Bitu, Datu Odin Sinsuat, Maguindanao.
Gibutyag ni Maguindanao Police Provincial Director Colonel Christopher Panapan nga nakadungog og lagubo sa iyang atop si Datukan, dungan sibat sa duha ka wala mailhing tawo nga sakay sa motorsiklo paingon sa direksiyon sa Cotabato City.
Alas 5:25 sa buntag sa Agosto 21, gisusi dayon ni Datukan kung unsa ang giitsa sa atop sa iyang balay.
Dako ang kakurat sa biktima gumikan iyang nadiskubre ang duha ka granada og duha ka 40 mm high explosive sa M79 grenade launcher nga hiniusang gibugkusan.
Gitawagan dayon ni Datukan ang mga opisyal sa Barangay nga maoy mitawag sa kapulisan.
Nagresponde sab dayon ang mga sakop sa Explosive Ordnance and Disposal Team (EODT) sa Philippine Army ug ila nalang gipabuto ang upat ka eksplosibo.
Sa kasamtangan ang kapulisan sa Datu Odin Sinsuat Maguindanao ang padayon nga nag-imbestiga kalabutan sa maong hitabo.