Pwerteng gubota niadtong Sabado sa mga buhatan sa Department of Social Welfare and Development (DSWD) kay gidagsa sa katawhan nunot sa Educational Assistance Program. Ang uban hapon sa Biyernes nag-estambay na sa mga buhatan sa DSWD ug didto nangatug aron lang makauna sa linya sa payout.

Didto sa Zamboanga City adunay 29 ka mga tawo ang nasakitan nunot sa pagdinaganay paingon sa coliseum diin ang taga DSWD didto nanghatag sa payout sa mga benepisyaryo.

Kinsay di mag-apas ini nga ayuda nga daghan man madawat kadtong pamilya nga daghang nagtungha kay ang mga tinung-an sa elementarya modawat P1,000 matag usa, P2,000 alang sa junior high school unya ang senior high school adunay P3,000 samtang P4,000 sa nagtungha sa kolehiyo diin sa mosunod lima ka Sabado mahitabo ang payout nga nagsugod niadtong Agusto 20 hangtod sa Septiyembre 24.

Ang mga kwalipikado nga makadawat niini kadtong mga tinun-an nga breadwinner, working student, nailo sa mga ginikanan unya anaa na nagpuyo sa paryente, anak og solo parent, way trabaho ang mga ginikanan, anak sa Overseas Filipino Workers (OFWs), anak sa biktima sa HIV, biktima sa pangabuso ug biktima sa mga kalamidad. Gikinahanglan nga dalhon nila ang gipangayong rekisitos sa DSWD nga naglangkob sa dokumento nga nagpamatuod nga na-enroll kini, ilang student ID ug kon ang mga ginikanan ang nagproseso ipakita sad ilang ID aron mahatag ang ayuda.

Dako na kaayo kini og ikatabang sa mga pamilya ilabi na sa ilang mga panginahanglan sa pagtungha. Ang problema kon masayop ang mga ginikanan sa paggasto niini kay ang mga Filipino naanad ra ba ining panultihon nga “one day millionaire” kay inig dawat na sa salapi, ang uban ilang gamiton sa ilang bisyo sama sa sugal, ug inom unya ipamalit og appliances ug uban pa unya wa na hinuon maadto sa tinuoray nga katuyoan nga itabang sa pagtungha sa kabataan.

Buhis sa katawhan ang tinubdan ning ayuda busa angay lang morespeto sila sa mga magbubuhis nga nagkayod sa trabaho ug di makareklamo kay diretso man dayon kuhaan sa gobyerno ang suweldo alang sa buhis. Maayo unta gamiton kining inspirasyon sa kabataan nga ang tabang sa gobyerno maoy mohatag og direksyon sa ilang kalampusan ug makahaw-as puhon sa ilang kalisod. (josephelvirtubilan@gmail.com)