Dunay nagpabiling lima ka mga Sabado ang gitagana sa Department of Social Welfare and Development (DSWD) 7 sa ilang pagpanghatag sa educational assistance, human sa unang distribution niadtong Agusto 20, 2022.
Gipahibawo sa DSWD 7 nga ang sunod distribution sa tag P1,000 ngadto sa P4,000, depende sa grado sa tinun-an nga nagtungha, ipahigayon sa Agusto 27 dayon sa Septiyembre 3, 10,17 ug 24 nga katapusang adlaw sa distribution.
Ang mga estudyante nga adunay scholarships, miyembro sa Pantawid ng Pamilyang Pilipino Program (4Ps) ug kadtong nagtungha sa state colleges ug universities ug kadtong mga tinun-an nga ang mga ginikanan naay trabaho dili makapahimulos sa maong programa.
Ang mga benepisyaryo nga kwalipikado sa ayuda giabisohan sa pagdala og duha ka kopya sa ilang study load/certificate of enrollment ug identification card (ID) nga nagpamatuod nga nag-eswkwela sila karon.
“Giawhag ang mga buot mangayo sa maong ayuda nga magpaabot sa pahibalo sa DSWD kung unsa ang mga LGU o barangay ug asa ang lugar sa payout,” awhag sa DSWD 7.
“Dili na kinahanglan nga magpalista og una ug dili kinahanglan moadto sa mga DSWD office sa lainlaing probinsya o sa City/Municipal Social Welfare (C/MSWDOs),” dugang sa pamahayag sa maong ahensiya.
Sa kinatibuk-an, ang DSWD nakahatag og kapin 48,000 ka mga benepisyaryo atol sa unang distribution sa ayuda niadtong Sabado, Agusto 20, sa tibuok nasod, diin ang Region 7 nakaapud-apod ngadto sa 3,339 ka estudyante.
Si DSWD-7 Regional Director Shalaine Lucero nagknayon nga hapsay ra ang distribution niadtong Sabado ug nagpasalamat siya sa kooperasyon sa mga local government unit ug mismo sa beneficiaries nga ningsunod ug ning-antos sa paglinya kay dili sama sa ubang rehiyon nga nasinati ang pagkaguliyang.
Ang direktor sa DSWD 7 niingon nga wala pa silay target sa gidaghanon sa beneficiaries nga mahatagan apan iyang gipadayag nga ang 1.9 milyunes ka mga tinun-an sa Central Visayas mokunhod pa sanglit mayoriya niini adunay kaya ang ginikanan, miyembro sa 4Ps; dunay scholarships o nagtungha sa state universities ug colleges.