Gisuspenso sa Korte Suprema ang usa ka huwes sa Manila Metropolitan Trial Court og 30 ka adlaw ug gimultahan og P50,000 tungod sa iyang pagbiaybiay ug pagpakauwaw sa litigants o kihante tungod sa ilang sexual orientation.
Sa 18 ka pahina nga desisyon nga sinuwat ni Justice Alfredo Benjamin S. Caguioa (A.M. No. MTJ-22-007, Marso 9, 2022), ang Labawng Hukmanan miingon nga way luna ang “homophobic slurs” sa mga hukmanan sa balaod.
Mao kini ang gisulti sa huwes, matod pa sa mga kihante nga sila si Marcelino Espejon ug Erickson Cabonita: “xxx pagka-bading, tomboy, lesbian, ayaw ng Diyos yun xxx” “So pag meron kang lesbian relationship, paparusahan yung anak mo. Dengvaxia, di ba? Kayo din kasi may kasalanan kayo sa Diyos eh.”
Matod pa sa Korte Suprema ang maong pamahayag nakalapas sa New Code of Judicial Conduct nga nagmando sa mga maghuhukom sa pagseguro sa patas ug angay nga pagtratar sa tanang moatubang sa hukmanan ug sa pagsabot sa nagkadaiyang mga kaliwatan, sex, relihiyon, edad, sexual orientation ug social ug economic status.
Nagpakita kini nga sensitibo ang Korte Suprema sa mga kaso sama niini ug sa panginahanglan sa mga balaod nga manalipod sa mga sakop sa LGBTQ community batok sa diskriminasyon ug sa hate crimes.
Gani, ang mga istrikto nga nasod sama sa Singapore inanay nga milugak ug misagop sa mga relasyon sa managsamang sex. Busa, sa taho sa Reuters, ang Singapore mo-decriminalize na sa pakighilawas tali sa lalaki ug lalaki. Apan ang mahimong magminyo mao ra gyud ang lalaki ug babaye.
Dinhi sa Sugbo, gipirmahan ni Cebu City Mayor Michael Rama niadtong Agusto 18, 2022 ang City Ordinance 2660 nga manalipod sa mga sakop sa lesbian, gay, bisexual, transgender, and queer (LGBTQ) community gikan sa diskriminasyon ug mga hate crimes.
Ang City Ordinance 2660, nga gipangamahanan ni Sangguniang Kabataan Federation President ug ex-officio Councilor Jessica Resch, magpahamtang og silot nga pagkapriso gikan sa tulo ngadto sa unom ka buwan ug multa nga P3,000 ngadto sa P5,000 depende sa kalapasan ug kabubut-on sa hukmanan.
Lakip sa gisilotan mao ang pagpakauwaw sa usa ka tawo atubangan sa publiko ug pagdagmal sa usa ka tawo tungod sa iyang sexual orientation. Gisilotan sab ang verbal or physical vexing, pag-harass ug paghulga sa usa ka sakop sa LGBTQ community ingon man sa paghimong kataw-anan ug pagkomedya subay sa sexual orientation.
Ambot lang kon apil ba niini kadtong estorya sa manag-uyab nga wa makapugong sa ilang gibati ug nagkahilawas gyud.
Pagkahuman, niingon ang babaye, “Love, duna koy ikompisal nimo. Christian ko.”
Tubag sa lalaki, “Katoliko ko. Pero gimahal tika bisan unsa pay imong relihiyon.”
Matod sa babaye, “Christian akong ngan sa wa pa ko mahimong Christine.” - edbarrita@gmail.com