Diputado: Problema sa trapiko misamot

Diputado: Problema sa trapiko misamot

Daghan ang miangay nga mismo ang Presidente maoy milingkod isip Kalihim sa Department of Agriculture (DA). Pero daghan sab ang wala moangay.

Atong hisgotan kini.

* * *

Nindot nga ang Presidente mao ra sab ang Kalihim sa DA tungod kay mahatagan gyod og importansiya ang patigayon sa pagkaon. Kon tan awon ang national budget, makita dayon nga gamay lang budget nga gigahin para sa DA, mas dako pa gani ang budget sa ubang departamento nga pulos lang panghatag sa mga tawo ang ilang budget og walay gitawag nga return of investment.

Kon dunay problema, dali ra kaayo tapokon sa Presidente ang mga opisyales nga maoy motagad sa maong problema, walay proxy sa meeting ug walay makabalibad nga conflict sa schedule.

Tanan gyod moatender ug dali ra kaayo mohatag og ayuda. Sulbad dayon ang problema.

Dili na kaayo lisod ipadagan ang mga programa kay gamiton man lang ang pangalan sa Presidente, ilabi na gyod ang usa mga farm to market road.

* * *

Lisod usahay kon ang Presidente mismo maoy modumala sa usa ka departamento.

Ngano man?

Tungod kay nasayod kita nga daghan kaayo og giatubang nga mga trabaho ug suliran ang Presidente.

Matod pa ni kanhi President Rodrigo Duterte, maglisod siya usahay og unsay iyang unhon pag-atubang kay pulos man importante. Mao sab kini ang sitwasyon ni Presidente Bongbong Marcos.

Tungod sa kadaghan sa iyang giatubang nga mga problema, mahimong maulahi ang dapat unta mauna.

Gani, mahimo na lang makalimtan ang angay buhaton kay dili baya ordinaryong tawo ang naglingkod sa posisyon.

Lisod pod usahay ang pagpadagan sa mga dokumento tungod kay dili basta basta ang mopirma niini.

Kon dunay meeting nga pagahimuon, kasagaran mahitabo isangon na lang kini sa laing opisyal tungod sa kadaghan sab nga giatubang ang Presidente.

* * *

Adunay maayo, aduna poy mga dili maayo sa maong sitwasyon.

Ang ato lang angay hinumdoman, bisan kinsa ang naglingkod sa maong posisyon, mahimo lang magmalampuson kon ayudahan siya sa iyang mga sakop.

* * *

Sa wala pa ang face-to-face nga klase ug pulos lang online classes ang gihimo, daghan ang reklamo bahin sa traffic. Bisan sa mga oras nga dili tinggawas sa mga opisina, puno lang gihapon ang mga karsada sa mga sakyanan.

Labi na gyod kon dunay ulan, mosamot kahuot labi na kon mobaha ang mga karsada.

Karon nga mibalik na ang face-to-face nga klase, unsa na ang sitwasyon sa kadalanan?

Misamot kabaga ug naghuot na ang mga karsada sa mga sakyanan.

Naapil ba kining maong problema sa mga giplanong buhaton sa mga namunoan karon?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph