2 senior nabali-bali ang lawas

NABANGGAAN sa pick-up ang usa ka motorsiklo nga gisakyan sa magtiayong senior citizen alas 4:25 sa hapon, Lunes, Agosto 22, 2022 sa probinsiya sa Cotabato.

Giila ang mga biktima nga nabugtoan sa kinabuhi nga mao sila Remedios Ferenal Gornez, magtutudlo sa Nalapaan Elementary School sa Barangay Nalapaan, Pikit ug si Pastor George Bato Gornez, molupyo sa Midsayap, Cotabato.

Gibutyag ni Cotabato Police Provincial Director Colonel Harold Ramos nga nagsakay ang mga biktima og motorsiklo gikan sa tunghaan pauli na sa ilang gipuy-an atol sa pagbunok sa ulan.

Apan pag-abot sa magtiayon sa Barangay Pagangan Aleosan Cotabato gibanggaan sila sa Hilux pick-up kolor puti nga dunay plaka nga NGA 1696 nga nag-overtake sa laing sakyanan.

Wala na makontrola sa drayber sa pick-up ang manobela ug gibanggaan ang kasugat nga motorsiklo.

Patay on the spot ang mga biktima nga nalagpot sa ilang gisakyan nga motorsiklo ug nagkabali-bali ang ilang lawas sa kakusog sa impak sa disgrasya.

Daghan ang nagtuo nga gumikan sa kakusog sa ulan wala maalinggatan sa drayber sa pick-up ang kasugat niya nga motorsiklo.

Boluntaryo sab nga misurender ang drayber sa pick-up ngadto sa kapulisan ug gitakda nga pasakaan sa tukmang kaso.