Nia tay giandam nga paabtik sa utok nga hayan makatabang sa inyong kaalam nunot sa paghandum sa “Buwan ng Wika” ug karong balik-face-to-face classes na. Okay class basaha ang sunod nga mga pamahayag ug kon sa inyong tan-aw tinuod ni, pilia ang “history.” Apan kon sa inyong tan-aw atik ra, pilia ang “tsismis.” Ang mga saktong tubag inyong makita sa ubos.
1. Sa 1972 novelty song nga “Magellan” ni Yoyoy Villame ang Pilipinas nadiskubre ni Magellan niadtong March 16,1521 ug ang barko ni Magellan unang nidunggo sa isla sa Limasawa. HISTORY O TSISMIS?
2. Ang “Lupang Hinirang” dili na orihinal kon itandi sa Spanish poem nga “Filipinas” nga gi-composed nilang Jose Palma ug Julian Felipe nga maoy gibasehan sa Philippine National Anthem. HISTORY O TSISMIS?
3. Ang “Umagang Kay Ganda” nga maoy campaign jingle ni Presidente Bongbong Marcos sa miaging piniliay gikan sa original English song nga “Beautiful Morning.” HISTORY O TSISMIS?
4. Ang sikat nga kantang “Boy (I Love You)” ni Cherie Gil niadtong 1979 gikan sa Japanese original version nga “Boy” sa Nailclippers. HISTORY O TSISMIS?
5. Ang title sa iconic OPM hit nga “Bakit” ni Imelda Papin wala sa iyang lyrics. HISTORY O TSISMIS?
6. Ang 1980 hit single nga “Butsekik” ni Yoyoy Villame kinopya ang tono sa foreign song. HISTORY O TSISMIS?
7. Ang iconic hit nga “Sayang” ni Claire de la Fuente dili Original Pilipino Music. HISTORY O TSISMIS?
8. Ang “Sugbo” nga maoy official anthem sa Probinsiya sa Sugbo gitagik sa kanhi Superbalita entertainment columnist Roger Serna. HISTORY O TSISMIS?
TUBAG:
1. Tsismis - Sa video nga gi-post sa 2021 National Quincentennial Committee (NSC) sa social media ilang gitataw nga ang barko ni Magellan unang nidunggo sa isla sa Homonhon, Samar ug dili sa Limasawa ug dili sab niadtong Marso 16,1521 kundi Marso 17, 1521 sukwahi sa giingon ni Yoyoy sa iyang kantang Magellan. Ang NSC maoy gitahasan sa gobyerno atol sa 500th anniversary celebration sa atong kagikanan. / Inquirer.net
2. History - Sa libro nga “Mabini’s Ghost” matod sa historian nga si Ambeth Ocampo nga ang ubang original meaning sa “Filipinas” ni Jose Palma nangawala tungod sa sigeng hubadhubad niini sa English ug Tagalog. “It is not only the music that is far removed from the original but something has already been lost in the translation itself of the lyrics.” Ang “O Sintang Lupa” maoy unang Filipino translation sa National Anthem nga giaprobahan sa Department of Education niadtong 1948. Gipausab ni sa Kalihim sa Education nga si Gregorio Hernandez Jr. niadtong 1954 (and some slight changes in 1962) nga mao na karon ang “Lupang Hinirang” nga gihubad ni Felipe Padilla de Leon. / Rappler ug thephilippinesday.com
3. History - Ang “Umagang Kay Ganda” gikan sa 1975 English song ni Butch Monserrat nga “Beautiful Morning.” Gihubad ni sa Tagalog ug gisalmot sa 2nd Metro Manila Popular Music Festival niadtong 1979 diin nahimong finalist nga gi-interpret nilang Ray-An Fuentes ug Tillie Moreno.
4. History - Ang “Boy (I Love You)” unang gi-record sa Japanese version sa Pinoy group nga Nailclippers nga nagbase sa Japan niadtong 1978. / YouTube
5. Tsismis - Ang title sa kantang “Bakit” ni Imelda Papin naa sa lyrics. Dili lang dayon mabantayan kay naa ni sa first stanza. “Buong akala koy hanggang wakas/ bakit biglang nagbago.”
6. History - Ang lyrics sa “Butsekik” kang Yoyoy apan ang tono gikan sa 1962 American hit single nga “Baby Cakes” ni Dee Dee Sharp. Nagplano ang mga Cebuano-Chinese nga ikiha si Yoyoy apan nasuta nga walay bisan usa nga Chinese word ang maong awit. / Wikipedia
7. History - Sa buhi pa si Claire dela Fuente wala gi-deny sa singer nga ang “Sayang” dili OPM kundi usa ka Malaysian song. Sa iyang pagkamatay niadtong Marso 30, 2021 nigawas ang video sa original version niini nga “Kau Membuat Ku Gembira” (You make me happy) nga gikanta sa Malaysian singer Sharifah Aini nga unang nisikat niadtong 1976. / Pep.ph
8. History - Ang “Sugbo” gi-composed nilang Dr. Susana B. Cabahug ug Rogelio Serna samtang ang musika ni Angel Cabilao nga gikanta sa Capitol Choir. Niadtong 2010 nipasar og balaudnon ang Provincial Board nga nagmando sa tanang publikong eskwelahan nga kantahon ang “Sugbo” human sa Philippine National Anthem atol sa flag ceremony. / cebugov.ph