TAGUM CITY, Davao del Norte -

NAPUTOS sa mga paso ang lawas sa usa ka lalaki human nakuryentehan samtang nagsubay sa linya sa internet didto sa Senangote 2, Magugpo East, Tagum City alas 8:00 sa buntag Huwebes, Agosto 25, 2022.

Ang biktima giila nga si Ren Ren Endal, project contractor sa Globe.

Base sa imbestigasyon sa awtoridad, ang biktima nagsubay sa linya sa internet apan aksidenteng nasangit ang ulo sa 69KV line sa National Grid Corporation of the Philippines (NGCP).

Giingon nga nakit-an na lang sa mga saksi nga dunay misiga sa taas nga bahin sa poste nga gikatkat sa biktima ug dayong nalabay kini apan wa mahulog, inay nagbitay sa gigamit nga bakus sa hawak.

Gidali pagdala ang biktima ngadto sa pinakaduol nga balay tambalanan pinaagi sa mga miresponding mga rescuer ug giingong dako kining buhi luyo sa daghang mga paso nga iyang naangkon.

Hinuon, padayon pa siyang giatiman sulod sa balay tambalanan.