MIABOT na og 23 ka mga lungsod sa probinsiya sa Maguindanao ang naapektuhan sa grabe nga pagbaha.
Kini mao ang Datu Montawal, Pagalungan, Datu Piang, Datu Salibo, Mamamasapano, Rajah Buayan, Sultan Sabarongis, Paglat, Pandag, Mangudadatu, Buluan, Datu Paglas, Northern Kabuntalan, Mother Kabuntalan, Datu Saudi Ampatuan, Shariff Aguak, Talitay, Talayan, Guindulungan, Datu Anggal Midtimbang, Sultan Kudarat, Shariff Saydona Mustapha ug Sultan Mastura.
Tungod niini, ang Sangguniang Panlalawigan miaproba atol sa ilang regular session niadtong Miyerkules, Agosto 24, nga ipailawom sa state of calamity ang probinsiya pinaagi sab sa rekomendasyon ni Maguindanao Provincial Disaster Risk Reduction and Management Office (PDRRMO) Head Nashrullah Imam.
Ang deklarasyon giuyonan ni Maguindanao Governor Bai Mariam Sangki Mangudadatu aron nga dali gilayong magamit ang calamity fund alang sa mga lungsod nga giigo sa baha.
Matud ni Imam nga unom ka lungsod sa probinsiya ang unang nideklarar og state of calamity tungod sa epekto sa halapad nga pagbaha sa sektor sa agrikultura.
Sa datus nga gipagawas sa PDRRMO, halos 47,000 ka pamilya sa tibuok probinsiya o kapin 234,000 ka indibiduwal ang apektado sa baha.