Ang burial assistance sa pamilya sa namatyan sa dakbayan sa Lapu-Lapu gihimo na nga P10,000 gikan sa P8,000.
Kini human ang giduso nga ordinansa ni City Councilor Annabeth Cuizon nga nag-ulohan og “An Ordinance Institutionalizing the Burial Assistance Program for Indigent Residents of the City of Lapu-Lapu and Providing Funds Thereof,” o naila nga Burial Assistance Program, giaprobahan sa Konseho atol sa ilang regular session sa Miyerkules, Agusto 24, 2022.
Si Cuizon, chairperson sa committee on social services, senior citizen and persons with disability (PWD), niingon nga panahon na nga patas-an ang burial assistance og P2,000 tungod sa hangyo sa katawhan tungod sa pagmahal sa gasto sa paglubong lakip ang presyo sa lungon.
“Due to inflation and the scarcity of cemetery spaces, the family is forced to go to private cemeteries and prices right now are also escalating,” matod ni Cuizon.
“Atoa ning tabang sa mga Oponganon nga indigent nga dili gyud intawon makapalubong sa ilang mga namatay nga miyembro sa pamilya tungod sa kawad-on ug sa kamahal sa lungon ug bayranan sa menteryo,” dugang niya.
Sa iyang social media post, si Lapu-Lapu City Mayor Junard “Ahong” Chan nipadayag sa pagpasalamat kang Cuizon tungod sa pagduso sa ordinansa sa pagpaumento sa naasoy nga ayuda.
“Dako na kaayo kini nga tabang alang sa atong mga kaigsuonang kabus hilabi na nga dili gayud nato matagna ang kamatayon ug ang uban dili gayud makapangandam sa pinansiyal,” matod ni Chan.
Gipasabot ni Cuizon nga ang porma sa ayuda mao ang paghatag og lungon ug ubang balayranan sa serbisyo sa paglubong ug ihatag sa kuwalipikadong claimants.
Dugang niya nga ang mayor dunay gahom sa pagpatubo pa sa kantidad sa burial assistance.
Sumala sa konsehal, ang namatay kinahanglan nga bona fide ug indigent resident sa dakbayan sa Lapu-Lapu hangtod sa panahon sa iyang kamatayon.
