MAAYONG balita! Nindot na gyod ang pagpamalengke sa Agdao Public Market sa Davao City gumikan hapit nang mahuman ang gikonsiderang pinakanindot nga palengke sa Mindanao.
Kon dunay mga airconditioned nga mga palengke sa pipila ka dapit sa Mindanao, ang Agdao Public Market duna sab ikapasigarbo gumikan ang pipila ka porsiyon niini, lagmit himuon sab nga airconditioned.
Sumala ni Davao City Economic Enterprise Officer-in-Charge Maximo P. Macalipes Jr. nga giandam na nila ang mga vendors alang sa posibleng turnover sa Agdao Farmers' Market sanglit 92.3 porsiyento na ang nahuman sa Phase 2 sa maong proyekto.
"Waiting lang pud mi sa Department of Public Works and Highways (DPWH) nga ma-turn over, sa among discussion, mora'g naa pay kinahanglan nga i-provide nga equipment sa atong Agdao public market that is why dili pa siya ma turnover," ingon sa opisyal.
Siya nidugang nga aduna na silay daang gihimo nga mga kalihokan aron maandam ang mga tindera sa umaabot nga turnover sa merkado.
"We conducted orientation for the renewal of the lease contract, unsa tong mga terms and conditions para if ever ma-turnover ang Agdao Farmers' Market ready na ang atong mga vendors sa ilahang mga respective nga stall," ingon ni Macalipes.
Ang Agdao Farmers' Market dunay moihap 494 ka mga vendors.
Ang merkado usab adunay 80 ka stalls alang sa meat section; 126 ka stalls para sa fish section; 20 ka stalls alang sa dressed chicken; siyam ka stalls alang sa ice storage; ug 19 ka stalls para sa commercial spaces. Kini alang sa ground floor.
Sa ikaduhang andana, adunay 134 ka stalls ug 33 ka stalls alang sa dry goods section. Ang ikatulong andana nahimutang ang lain-laing mga negusyo, sama sa mga klinika, boutique, o open spaces ug adunay total nga 38 ka stalls ug ang duha ka function halls.
Sumala ni Macalipes nga ang kinabag-an sa kita nga makuha sa City Economic Enterprises (CEE) gikan sa walo ka merkado sa dakbayan. Sukad sa Enero, ang kita gikan sa mga merkado niabot na sa 62 porsiyento sa P112,625,000 nga target sa tuig. Ang kinatibuk-ang target sa CEE karong tuiga anaa sa P197,725,000.
Dugang niya nga ang dakbayan pinaagi sa LGU Special fund nigahin og budget alang sa pagpalambo sa Bankerohan Public Market ug sa Toril Public Market nga 93 porsiyento na nga nahuman. Ang pag-uswag sa ubang mga merkado anaa usab sa pipeline.
"Ang CEE nagapaningkamot gyod nga makakita ta og sources of revenue para matabangan nato ang mga current thrust and programs sa siyudad sa Davao, especially ang social services nga program ni Mayor Baste," panapos ni Macalipes. (Uban sa taho sa City Information Office)