Sa edad nga 35, sayong na lola akong klasmate nga si Ana (tinuod ngalan gitago).
Sa among reunion, dereyot siya nahiubos kay wa man dayon siya halos mailhi kay mihugo man iyang lawas unya mitiguwang sab iyang dagway sa tumang trabaho ug stress binantay sa iyang mga apo.
Daghan ang puparehas og kaso ni Ana maong akong ipaambit ang mga rason nganong dali o sayong matiguwang:
Una ang stress. Basi sa gihimong pagtuon, ang stress maoy numero unong makapapaspas sa katiguwangon sa hitsura ug maka-ingon sa mga sakitsakit sama sa sakit sa kasingkasing ug cancer.
Ikaduha ang pag-inum og ilimnong makahubog. Kining mga ilimnon maka pa-uga o dehydrate sa panit. Mao sab ni rason sa pagpanghubaghubag sulod sa lawas.
Matod sa mga eksperto, mas daling mokunot ang panit labi na sa may nawong, ubos sa mata ug agtang kon kanunay mag-inum. Busa, para magpabiling batan-on tan-awon, ayaw adlaw-adlawa ug palabi-i ang inum. Dapat usa ka shot lang sa hard drinks o duha ka botilyang beer matag semana.
Sunod ang kakuwang sa katulog. Dako ang posibilidad nga mag-uga ang panit unya modagko ang eyebags kon kuwang sa tulog. Ang mga babaye nga mas taas ang oras sa pahuway ug maayo ang tulog mas hamis og kutis unya wa sab ka-ayoy kunot-kunot ang nawong. Angay matulog 7-8 ka oras kada adlaw.
Ika -upat ang sige ka expose sa haring adlaw. Angay maggamit og sunscreen nga di mo ubos sa 30 SPF para maprotektahan ang nawong. Apan kon way budget ipalit, palayo na lang sa init o paggamit og payong aron di mabuwad sa adlaw. Makatabang sab ang unod sa dahon sa Aloe vera ihapas sa sunburn o nag-ugang panit. Ang subra ug dugay nga pagka-buwad sa adlaw makapa sunog sa panit o sunburn. Makapatiguwang sab kini tan-awon o photo-aging maong sa di madugay manggawas ang sun spots o tumtom.
Katapusan ang subrang pagkaon og kamay o refined carbohydrates. Gawas nga dali kining makapa-tiguwang, makapatambok sab nga mopaingon sa sakit nga diabetes ug sakit sa kasingkasing.